Säminuorâi taaiđâtábáhtus, mii uárnejui Ucjuuvâst njuhčâmáánu 25.-26. peeivi, lâi oppeet säminuorâi já –máttáátteijei ivnáás tááiđui čäittim. Muusik, mii lâi tábáhtus válduteeman, čuojâi Ucjuvnjäälmi škoovlâ salist juáigusin, lavlun já räppin, maid čuojâldittii maaŋgah nuorâi jieijâs muusikjuávhuh. Sämitigge kijttá puoh taaiđâtábáhtus orniimân sierâ vuovijn uásálistem peelijd luhostum tábáhtusâst!

Säminuorâi ovdâsteijen väldikodálii SOUNDS-tábáhtusân  Porvoon väljejuvvojii ucjuvlâš Villat-juávkku já avveellâš Čagaldahttit-juávkku. Villat-juávkku vuálgá väldikodálii tábáhtusân pitáinis Dan man oainnát, mon stivrejeijen lii Niilo Rasmus. Avveel vyelitääsi škoovlâ juávkku Čagaldahttit vuálgá Porvoon pitáinis Čagaldahttin, mon stivrejeijen láá  Maarit Niittyvuopio, Laura Niittyvuopio já Hannu Huumonen.

Taaiđâtábáhtus nuurâi Ucjuvnjäälmi škoovlâ sali aaibâs tievâ ulmuid tuorâstuv 26.3. Pääihi alne lijjii säminuorah já sii máttáátteijeeh, huolâtteijeeh já keččeeh pajeláhháá 400 olmožid. Uásálisteeh pottii ohtsis paijeel 15 sierâ škoovlâst sämikuávlust já ton ulguubeln. Sämikuávlust uásálisteeh pottii masa jyehi škoovlâst. Sämikuávlu ulguubeln uásálisteeh lijjii Helsigist já Ruávinjaargâst. 

Suulân peeli taaiđâtábáhtusân uásálistum nuorâin uásálistii taaiđâtábáhtus pargopáájáid já lekkâmtilálâšvuotân, moh uárnejuvvojii jo koskoho 25.3. Pargopáájái válduteeman lâi teatter, moin halijdii ráhtádâttâđ ive 2016 tábáhtusân. Suoivâteatterpargopáájá stivrij kielâpiervâlstivrejeijee já musijkkár Heli Aikio já eres teatterpargopáájáid elleekovestivrejeijee Pauliina Feodoroff, musijkkár-niävttár Sverre Porsanger, niävttár-toimâtteijee Heli Huovinen já párnái TV-ohjelm Unna Junnást uápis niävttár Irene Länsman. Uási nuorâin finnejii uápástem ráiđukovepaargon uápásteijen kovetaaiđâr Sunna Kitti. Uási nuorâin finnejii oppâtiijme sämikielâlii räpmuusik syeligâsvuođáid uápásteijen musijkkár Ailu Valle.

Säminuorâi taaiđâtábáhtus iälá jo viiđâd ihelovvees já tast lii iheluuvij mield šoddâm tergâdis aareen maŋgáid nuorâ taiđuu hárjutteijeid. Taaiđâtábáhtus, mii uárnejuvvoo ihásávt, addel tergâdis lávdástemvuáttámušâid já mii puoh tehálumos, jieijâskielâlijd kuldâleijeid já keččeid. Säminuorâi taaiđâtábáhtus kiellân Ucjuuvâst lijjii puoh kulmâ Suomâst sarnum sämikielâ. Tábáhtus laiđiisteijen lijjii nuorttâlâškielâlâš Anna-Katariina Feodoroff, anarâškielâlâš Martta Alajärvi já tavesämikielâlâš Tuomo Laiti.

Tábáhtus tuámmárin lijjii nuorttâlâškielâlâš Anna Lumisalmi, anarâškielâlâš Heli Aikio já tavesämikielâlâš Ailu Valle. Ohtâ taaiđâtábáhtus prinsiipijn lii, ete tot tuáimá sämikielân. 

Säminuorâi taaiđâtábáhtus ornij sämitigge oovtâstpargoost Ucjuvnjäälmi škovláin. Tábáhtus ruttâd máttááttâs- já kulttuurministeriö. Säminuorâi taaiđâtábáhtus lii uási väldikodálii Nuorâ kulttuur- tábáhtus. Tábáhtus tekniikâst västidij Tuupa Records jođetteijen Jussi Isokoski.

Taaiđâtábáhtusâst stipendijguin palhâšuvvii čuávuváid juávhuid:

Gáktenieiddat: Mánu luohti

Kärigâsnjaargâ škovlâ 6-9-ihásiih, stivrejeijee Kaaren Kitti

Hearvaduottar: Máttuid árbi

Heta škovlâ 10-15-ihásiih, stivrejeijeeh Inga-Máret Gaup-Juuso já Anne-Maria Kukkonen

Janita & band: Iežas geaidnu

Avveel pajetääsi škovlâ, 10-15-ihásiih, stivrejeijee Katri Kittilä

SKT: Jåågar lij jie´lli, One of Us, Duna Duna

Čevetjäävri škovlâ, 10-15-ihásiih, stivrejeijee Erkka Antila já Seija Sivertsen

Giehtaruohttasa mánát: Buot jagiáiggit

Käresavvoon škovlâ, 10-15-ihásiih, stivrejeijeeh Ulla Magga já Taina Syväjärvi

Puállâm váimu: Ääših maid monâttáim tuulân

Avveel luvâttâh, 16-20-ihásiih, stivrejeijee Petra Kuuva

Villat: Dan man oainnát

Ucjuvnjäälmi škovlâ, 16-20- ihásiih, stivrejeijee Niilo Rasmus      

Čagaldahttit: Čagaldahttin

Avveel vyelitääsi škovlâ, 10-15- ihásiih, stivrejeijeeh Maarit Niittyvuopio, Laura Niittyvuopio já Hannu Huumonen   

Keejâ täst TAAIĐÂTÁBÁHTUSKUUVIJD, koveh Terhi Tuovinen.