| Sämitige ovdâsteijeeh kollii Helsig já teivâdii sierâ ministeriöi virgeulmuid já kulttuurpargo ruttâdeijeid |
|
|
|
Sämitige saavâjođetteijee Tiina Sanila-Aikio, Sämitige jeessân já kulttuurlävdikode saavâjođetteijee Tauno Haltta, má. haldâttâhhovdâ Pia Ruotsala já vs. kulttuurčällee Riitta Orti-Berg kollii Helsig 5.-7.5.2015 já teivâdii sierâ ministeriöi virgeulmuid. 
Čuovâkove Minna Rantala
Ohjelmân kullii el. máttááttâs- já kulttuurministeriö, sosiaal- já tiervâsvuođâministeriö, staatâvarijministeriö sehe jotolâh- já viestâdemministeriö kolliimeh. Lasseen sämitige ovdâsteijeeh uápásmuvvii City-Sámit rs:n, Veikkausân, Taiđuu ovdedemkuávdážân, Koneen Säätiön já Suomâ kulttuurruttârááju tooimân.
Sämitige ovdâsteijeeh oovdânpuohtii sämikulttuur já sämikielâi tile Studia Generaliast majebaargâ 5. vyesimáánu. Sosiaal- já tiervâsvuođâministeriö já olgoašijministeriö virgeulmuuh kuldâlii oovdânpyehtimijd peerustmáin sehe koijâdâllii já savâstâllii aktiivlávt.
Staatâvarij- sehe máttááttâs- já kulttuurministeriöst savâstâllâm fáddán lâi Sämitige kulttuurlävdikode huolâ nk. säämi kulttuurmeriruuđâ keelijdmettumvuođâst. Kyevti majemuu ive kulttuurmeriruttâ lii lamaš 176 000 eurod. Teivâdem ulmen lâi pyehtiđ oovdân staatâ budjetist sämikielâlii kulttuur oovdedmân já sämiseervij tooimân väridum meriruuđâ merhâšume sämmilii kulttuurân.
Čuovâkove Minna Rantala
Sämitige ovdâsteijeeh uápásmuvvii City-Sámit rs tooimân sehe seervi ornim kielâpiervâltooimân kolliimáin kielâpiervâl Mánnu tiilijd Pasilast. Toos lasseen ovdâsteijeeh ellii uápásmim Veikkaus, Taiđuu ovdedemkuávdáá, Koneen Säätiö já Suomâ kulttuurruttârááju tooimân. Kulttuurpargo merhâšittee ruttâdeijeid mainâstii Sämitige kulttuurlävdikode tooimâst sehe sämmilii kulttuurpargo syergist.
Sämitige saavâjođetteijee já má. haldâttâhhovdâ teivâdáin riehtiministeriöst riehtiminister Anna-Maja Henriksson sehe ministeriö virgeulmuid. Mieldi lijjii meid värisaavâjođetteijeeh Heikki Paltto já Ulla-Maarit Magga sehe saavâjođetteijee išedeijee Inka Saara Arttijeff. Teivâdmist savâstâllii Sämitige äigikyevdilis aašijn sehe lahâhaavâin, el. säämi kielâlaavâ täärhistmist. Saavâjođetteijeeh halijdii meid kijtteđ riehtiminister Henriksson suu mávsulii pargoost sämmilij pyerrin taan vaaljâpaje ääigi. |
|
| Viimeksi päivitetty ( 21.05.2015 ) |