Sämitige stivrâ tuhhiittij ive 2014 ruttâtuálulopâttem já ton puáđusreknistem, táásus já toi lahtostiäđuid. Lasseen stivrâ tuhhiittij toimâciähus ja ton tivomijd sehe vuáláčaalij ruttâtuálulopâttem. Stivrâ oovdânpuovtij ete Sämitige čuákkim kieđâvuš já naanood táid äššikiirjijd oovtâst tilitähistemciähusáin, mon tilitärhisteijeeh maŋeláá adeleh.

Stivrâ tuhhiittij Sämitige čuákkimân oovdânpyehtimnáál oovdânpuáhtus sämmilâšmáttááttem ovdâdem já sämikielâlâš oppâmateriaalpargo kyeskee staatâtoorjâst ive 2017 ruttâtuáluáárvust, oovdânpuáhtus sämmilâš kulttuurmeriruuđâst staatâ ruttâtuáluáárvun 2017, oovdânpuáhtus sämikielâlâš soti(sosiaal- já tiervâsvuođâtipšom) -palvâlemij turviimist já ovdedemist ihán 2017 sehe oovdânpuáhtus sämikielâlâš arâšoddâdempalvâlemij turviimist já ovdedemist ihán 2017.

Stivrâ savâstâlâi Säämi kielâlaavâ ovdedemtáárbuin. Riehtiministeriö lii táttum Sämitige celkkiđ fiäránijdâs Säämi kielâlaavâ heiviitteemist. Celkkimtáttum lii uási riehtiministeriö algâttâm Säämi kielâlaavâ tárhistemohjelm, mon ulmen lii miäruštâllâđ laavâ toimâm. Stivrâ adelij saavâjođetteijei já kielâtorvočällei aairâ hammiđ lopâlâš celkkim.

Stivrâ tuhhiittij sämmilij kulttuur- já kielâpiervâltooimâ ruttâdemvuáđustâsijd. Sämitige sosiaal- já tiervâsvuotâlävdikodde lii stiivrâ miärádâsáin valmâštâllâm jyehi ive oovtâst kielâpiervâlpargeiguin ruttâdemucâmušâid ministeriön. Sämitigge oovdânpuáhtá ruttâdemvuáđustâsijn, et máttááttâs- já kulttuurministeriö haldâttâh vyelni čujottuvá sämmilij arâšoddâdempalvâlemij já kulttuur- já kielâpiervâltooimâ turviimân staatâtorjân ohtsis  4 790 000 eurod, main 2 400 000 eurod sämikielâlâš arâšoddâdempalvâlemij turviimân ubâ enâmist, 170 000 eurod sämmilij arâšoddâdem- já kielâpiervâlstivrejeijei viirgij vuáđudijmân Sämitige ohtâvuotân já 2 220 000 eurod sämmilij kulttuur- já kielâpiervâltooimân.

Stivrâ savâstâlâi Sämitige suhâpuolvâohjelmist já meridij sirdeđ ääši jotkâvalmâštâlâmân. Ohjelm ulmen lii ovdediđ sämmilij siärvuslâšvuođâ Sämitige toimâohjelm vaaljâpajen 2012-2015 asâttâm ulme mieldi. Suhâpuolvâohjelm ulmen lii, ete sierâ suhâpuolvâi (ahejuávhui) táárbuh váldejuvvâjeh vuotân Sämitige tooimâst já ete sierâ suhâpuolvâi koskâsâs koskâvuotâ lassaan. Ohjelm lii vuávvájum sierâ lävdikodij ohtsispargoin já tast kieđâvuššâjeh sierâ suhâpuolvâi sierânâskoččâmâšah sehe táárbuh.

Stivrâ meridij Sämitige uásiväldimist Suomâ jiečânâsvuođâ čyeti-ihásâšjuhleihe 2017 -ohjelm vuáváámân. Suomâ jiečânâsvuođâ juhleive teeman lii Oovtâst, já ulmen lii rähtiđ ellee ohjelm staatârääđi kanslia stivrim vyelni oovtâst sierâ tuáimeiguin. Juhleive vuávájeh jyehi mánupaje čokkâneijee stivrâ já jyehi ive čokkâneijee lävdikodde. Airâskoddeest Sämitige oovdâst sahâjođetteijee. Stivrâ meridij, ete Sämitigge váldá uási Suomâ 100 -juhleihán sämmiliih, romaneh já Suomâ jiečânâsvuotâ -teemain. Tooimâ vuáváámân já ruttâdemucâmus valmâštâlâmân väldih uási Petra Magga-Vars, Riitta Orti-Bert já Oula Guttorm.

Stivrâ meridij ávus savâstâllâmtilálâšvuođâ orniimist anarâšâi äigikyevdilâš aašijn. Tárbu vijđes savâstâllâmtilálâšvuođâ orniimân sehe Sämitige aktijvâlâš rooli ääšist lii vuálgâm Sämitige anarâšjesânijn. Huollân lii anarâšâi siskáldâs juáhánem, mii lii ucceblovo eellimvyeimi turvim peeleest uáli huolâstitteijee. Stivrâ meridij, ete savâstâllâmtilálâšvuođâ valmâstâllâmist västidävä saavâjođetteijee išedeijee já Sämitige jeessân Anna Morottaja.

Stivrâ uápásmij Sämitige ruttâtuálu olášumraaportân ääigist 1.1.-30.4.2015 já merkkij olásumraaport tiättun. Lasseen stivrâ mieđettij iäránem Tauno Haaltan Nuorttâsämmilâškulttuurvuáđudâs stiivrâst já valjij Sämitige uđđâ ovdâsteijen vuáđudâs stiivrân Pertti Heikkuri.

Lasetieäđuid addel Sämitige saavâjođetteijee Tiina Sanila-Aikio

 puh. 050 300 1780, tiina.sanila-aikio(at)samediggi.fi