Čáitálduv olášuttem lii Siida já säminuorâi taaiđâtábáhtus váldu-uárnejeijee, Sämitige ohtsâšpargo. Čáitáldâhân láá nuurrum taaiđâtábáhtus muštoh paijeel 20 ive ääigist, Fáárust lii meid videočuágáldâh 2015 tábáhtusâst Uccjuuvâst. Tábáhtus jieš lii uárnejum jo paijeel neljilove ihheed – já puáhtá jyehi ive oovdân uđđâ čepis nuorâid.

 

Tábáhtus lii merhâšittee sehe nuorâi taiđuu et sämikielâi uáinust. Tot lii ain áinoo 1970-lovo aalgâst jyehi ive uárnejum sämikielâlâš nuorâitábáhtus Suomâst.

 

- Säminuorâi taaiđâtábáhtus uápisin! –čáitáldâh heivee pyereest Uccjuuhân, ive 2015 taaiđâtábáhtus lâi meid tääbbin Uccjuuvâst, ettâv Marjo-Riitta Rantamäki já Anni Näkkäläjärvi. Sämimuseo Siida čuágálduvmiäštár Rantamäki lii lamaš algârääjist fáárust olášutmin čáitálduv. Näkkäläjärvi västid Sämitiggeest taaiđâtábáhtus orniimist. – Lasseen Uccjuuvâst láá puáttám ennuv tääsnih, kiäh láá lamaš vuosmuu kerd läävdi alne taaiđâtábáhtusâst, já šoddâm maŋeláá eenâb tobdosin.

 

Uccjuuv maŋa taaiđâtábáhtusčáitáldâh sirdoo Turku aalmugijkoskâsâš kirjemessuid, moh uárnejuvvojeh 2.-4.10.2015. Ive 2016 aalgâst čáitáldâh lii uáinimnáálá Hetta luándukuávdáš Skierrist já cuáŋui-vyesimáánust 2016 Koilliskaira luándukuávdáš Tankavaarast Vuáččust.

 

Koveh: Uccjuuhâ 11.6.2015, Anni Näkkäläjärvi. Čáitáldâh pajedij škovlâmuštoid puárásub ulmui mieláid. Kooveest: Kaarina Morottaja, Kirsti Paadar já Uula Paadar.