Kooveest láá puoh kuttâ škovlim- já oppâmateriaaltoimâttuv kesihárjuttâllee: Risten Mustonen, Milla Pulska, Arla Magga, Anna-Katariina Feodoroff, Henna Lehtola já Solja Magga. Kove Nihkolas Valkeapää.

 

Henna Lehtola lii uáppen Oulu ollâopâttuvvâst anarâškielâ amnâsmáttáátteijen já lii ohtâ vuosmuin anarâškielâ uáppein, kote lohá anarâškielâ válduamnâsin. Henna pargoid kesihárjuttâlmist kuleh vuáđumáttááttâs kuálmád luoka matematiik kirje jurgâlem já eenikielâ materiaalij ovdedem vuáđumáttááttâsân. Henna stivrejijjen oppâmateriaalpargoost tuáimá oppâmateriaal proojeektpargee Miina Seurujärvi.

 

Anna-Katariina Feodoroff lii ive 2014 pajeuáppee. Sun lii ohtâ vuosmuin, kote čaalij pajeuáppeeiskosist nuorttâlâškielâ eenikielân já uáppá tääl šoddâdemtiettuid Laapi ollâopâttuvvâst. Anna-Katariina ráhtá nuorttâlâškielâ vieres kielâ oppâkirje luvâttâhân já čuákkee nuorttâlâškielâlijd já nuorttâlâškielân jurgâlum laavluid laavlâkirjážin. Anna-Katariina stivrejijjen oppâmateriaalpargoost tuáimá nuorttâlâškielâ oppâmateriaal proojeektpargee Merja Fofonoff, kote lii tegu Miina Seurujärvi-uv uđđâ pargee škovlim- já oppâmateriaaltoimâttuvvâst.

 

Arla já Solja Magga juátkiv kesihárjuttâlmist oovdeb keesi algâttum digitaallâš oppâmateriaal kietâčalluu čäällim. Digimateriaalrähtim lii uđđâ syergi sämitige oppâmateriaalpargoost. Vuosmus aalgâ rääjist jieijâs pargon rahtum digimateriaal valmâštuvá tavesämikielâ vieres kielâ uđđâ oppâkirjerááiđun, mii lii tääl rähtimnáál. Rááiđu vuosmuš uási, Gea 1, almostui moonnâm ive ääigi já ton kietâčalluu lii čáállám Oona Länsman. Arla já Solja oppâv Oulu ollâopâttuvvâst uáiviaamnâsin tavesämikielâ.

 

Risten Mustonen jurgâl já soovât tavesämikielân suomâkielâlâs ’Tieto taito & temppu’ lyevdispeelâ, mii lii ovdil almostittum jo anarâškielân. Spellâ heivee vuálá škovlâahasáid já uccâ škovlâlijd. Risten uáppá Oulu ollâopâttuvvâst tavesämikielâ já matematiik máttáátteijen. Risten já Arla uđâsmittáin keessiv 2014 Pekka Lukkari (Biehtar Ánte) 1970-lovvoost almostittem tavesämikielâlâš luhâmuš ’Lohkamušak’ taan äigásáš ortografian.

 

Milla Pulska uđâsmit já ráhtá uđđâ materiaal sämitige päikkisijđoi ohtâvuođâst almostittum Oktavuohta -nettiloostân. Milla uáppá sämikielâlâš luokamáttáátteijen táiđu- já taaiđâtiäddusâš škovliittemohjelmist Oulu ollâopâttuvvâst. Milla lii sahhiittâllâm nettiloostâ várás Hildá Länsman, Áile-Risten Holmberg, Mikkâl Morottaja ađai Amoc, Mikkel Näkkäläjärvi, Henna Lehtola já Niillas Holmberg. Uđđâ muštâlušah láá nettiloostâst luuhâmnáálá syeinimáánust.

 

2010-lovo rääjist sämitige meriruttâtile lii puáránâm já ton tááhust sämitigge lii puáhtám pálkkááttiđ eenâb oppâmateriaalpargeid ko kuássin ovdil. Lasetiäđuh sämitige almostittem oppâmateriaalijn tast.