"Hirmādāsrįp" anarākielān |
![]() |
![]() |
Sämiráp eeči Amoc ráppáá uhkevuálásâš anarâškieláin, mon sárnooh láá onnáá peeivi áárvu mield 350-450. Kielâ lii iäláskâm majemui kyevtlov ive äigin eromâšávt kielâpiervâltooimâ tiet. Mikkâl eeči Matti Morottaja lii lamaš piejâmin kielâpiervâl joton. Amoc lii kočodum anarâškielâ sänituálvoojin, mutâ sun jieš iätá, et sun tuše ohtâ olmooš iärrásij kielâ oovdân pargei juávhust. Amoc aalgij ráppáđ anarâškielân vistig keččâlemmieláin, mutâ tot lâi sunjin meiddei luándulâs, tondiet ko tot lii suu eenikielâ. Amoc tobdá muusik rähtim já čäällim terapiatoimân. Anarâškielâ kevttim já ovdevem tast siämmást lii fijnâ lase.
Amoc lávástâlmin Taiga Festivaalist 2015 Tankaväärist.
Ko suomâráp aalgij leđe piivnoh 90-lovo loopâst, Mikkâl še movtáskij tast, ko tot lâi oovtâ mielâst älkkees muusikhäämi. Sun mielâstui eromâšávt sanijguim konstušmân já teknisâš rääpin, puoh riimij máhđulâsvuođâid. Amoc jieš lii kuvvim suu muusik ”hirmâdâsräppin” ja tot huámášuvá motomij pitái mainâsijn. Lusis rääpi lasseen Amoc lii ráhtâm meiddei tobdoid kiässeid pittáid.
Amoc kiävttá suu teevstâin ennuv viärdádâsâid ijge räähti ärbivuáválâš čurmâmlinjâšrääpi. Sämmilâš mytologia addel sunjin motomin inspiraatio teemaid. Mudoi sämmilâšvuotâ uáinoo Amoc musiikist tevstâi sämikielâlâšvuottân. Suu biitij stijlâ lii maailmvijđásâš, Mikkâl ij lah irâttâm pyehtiđ sämmilâšvuođâ toid ovdâmerkkân instrumentmaailm peht. Nube tááhust ij lah tehálâš sierriistâllâđ, et moh ääših láá sämmiliih já moh iä. Amoc jiejâs mielâst sämmilâš muusik miäruštâllâmin pijsáá to, et muusikrähtee lii sämmilâš. ![]()
Mikkâl muusikpeeli ovdán táál pyereest. Amoc lii álgâm lávástâllâđ táál meiddei bändijn, mii puáhtá mielâkiddiivâš lase live-fiäránân. Bändijn Amoc lávdástâl el. Riddu Riđđu -algâaalmugfestivaalijn 2015 Tave-Taaâst. Tobbeen tuálloo meiddei Inger-Mari Aikio-Arianaick stivrim ”Amoc ¬– Vuosmuš” -dokumentfiilmâ vuosâeehid. Lasseen keessiv 2015 almostuvá Amoc nubbe album, mon pargonommân lii Faabelit. Uđđâ skiärrust lii Mikkâl mield eenâb čapis huumor já suottâs ko vuosmuš oleskukkosâš Amok-kaččâm -skiärrust. Uđđâ skiärru lii maaaŋgâhámásâš já tast lii ohtââ meetaalpittá-uv.
Tevstâlávt uđđâ skiärru lii mainâsteijee. Tast láá uáinuh puátteevuođâst sehe muáddi persovnlâš pitá. Lyriikkain láá metaforah ohtsâskodálijn čuolmâin gloobaallâš tääsist. Mudoi Amoc ij lah kiäsuttum säärnidmist ijge sun haalijd väldiđ uáivil politiikan. -Must ij lah tyehijuurdân vaiguttiđ ulmui jurduid, iätá Mikkâl. -Tehálumâš ulme lii rähtiđ makkuuttâstaiđuu olssân já skipárijd, já jis eres ulmuuh-uv halideh kuldâliđ, te to lii tuše šiev äšši.
Liiŋkih: http://www.tuuparecords.fi/amoc https://play.spotify.com/artist/5zkhOMIQEsnM3MjwzXAOWu https://itunes.apple.com/gb/artist/amoc/id257994906 http://riddu.no/se/program/premiere-amoc-vuosmus https://www.youtube.com/watch?v=bCDqAq3S8ws (Amoc: Suomârâp Uarjih) https://www.youtube.com/watch?v=xBHF731DnYY (Amoc: Šaali)https://www.youtube.com/watch?v=-56xy7NhAm4 (Amoc: Kolle aksu)
Tekstâ já koveh: Milla Elmiina Pulska Majemustáá peividum/ |
|
Viimeksi päivitetty ( 01.07.2015 ) |