Áile-Risten Holmberg lii šoddâm Ucjuuvâst já lii uáppâm nuorâi- já astoäigistivrejeijen Ruávinjaargâst. Astoäigin Áile valastâl sehe puuđââld muusik. Sun lávlu já juáigá jyehi peeivi meiddei pargostis párnáitipšon sämikielâlâš peivikiäčust Ruávinjaargâst. Muusikvästideijen sun suáittá párnáiguim ennuv já máttát siämmáid lavluid, moh láá pááccâm mielân suu jieijâs pärnivuođâst. -Párnááh lijkkojeh hirmâdávt lávlumân já láá nuuvt čeepih, Áile rámmoo.

Peivikiäčun puáhtá orniđ jyehilágán tooimâid mielâkuvviitâs já sämikulttuur kevttimáin. Galddázat-juávhust lii lávlum já juáigum lasseen rahtum sämituojijd, njuárustum suopânáin já juttum ennuv mokkemaađhijn. Párnááh láá ráhtâm meiddei suábbipoccuid, mooiguim láá sierâdâm pygálys. Kavpugist sáttá motomin leđe vaigâd toollâđ sämikulttuur já kielâtááiđu paijeen, ko sämikielâ ij veltihánnáá kulluu kosten. Áile-Risten pargopääihi aargâst orjâlâskielâ kulloo já sämikulttuur uáinoo. Táál sämmiliih láá ennuv kaavpugijn já Áile mielâst sämikielâ tile puávtáččij leđe Ruávinjaargâst-uv pyereeb.

Áile vaaldij uási The Voice of Finland -raađhâkiišton, mii lâi váhá paldee fiäráán. Áile halidičij finniđ eenâb visesvuođâ lávdástâllâmân. Sun finnij toos hárjánem, ko lâi artistin legendaarisâš Veijo Länsman muštokonseertist. Tobbeen lâi Veijo eellim muštâlem já suu lavlui lávlum. Kesimáánust 2015 uárnejum konsert Nuárgám Vyelikiävŋá teermist lâi Áile mielâst liägus já ereslágán muusiktábáhtus. Puátteevuođâst Áile halidičij lávluđ eenâb almolávt já tilálâšvuođah toos vissásávt šaddeh-uv.

Áile-Risten artistin Veijo Länsman muštokonsertist kesimáánust 2015.

Liiŋkih:

https://www.youtube.com/watch?v=hi1Zd0Eu1cg (Áile-Risten: Ráhkisvuođa hávdd´al´)

http://www.rovaniemi.fi/fi/Palvelut/Lasten-paivahoito/Paivakodit/Keskusta-Ounasjoen-alue/Sahanperan-paivakoti-ja-Saamenkielinen-paivakoti

http://yle.fi/uutiset/muistokonsertti_nuorena_hukkuneen_saamelaismuusikon_kunniaksi_kesakuussa/7990671

http://yle.fi/uutiset/hirvasvuopio-laiti_veijo_lansman_muitokonsearttas_ii_leat_imas_ahte_su_lavlagat_leat_bahcan_eallit/8055460

Tekstâ já kove: Milla Elmiina Pulska

Majemustáá peividum/