Hildá Länsman lii ucjuvlâš nuorâ nisson, kii pajanij ulmui tiätuvuotân eromâšávt Uđđâ Muusik Kišto peht kiđđuu 2015. Kišto vyeittee ovdâstij Suomâ Euroviisuin já Solju ulâttij UMK:st niäljâd sajan. Hildá vaaldij kiišton uási enijnis Ulla Pirttijärvi-Länsmanáin. Sunnuu kištopitá nommâ lâi Hold Your Colors, mast kullui meiddei juáigus. Hildá valdâl, ete fiäráán lâi huššááš já fiijnes.

Hildá lii iällâm musiikkijn ton rääjist ko lâi pärni já sun lii šoddâm juáigumärbivuohân. Juoigâm lii Hiildán tehálâš kiäinu olgospyehtiđ tobdoid, pirrâs já jieijâs tuávváá. Vuossâmuu juáigusis sun rahtii 3-ahasâžžân já vuáđuškovlâäigin suu movtijditij muusik rähtimân muusikmáttáátteijee Niilo Rasmus. Táál Hildá uáppá Säämi Ollâškoovlâst Taažâ Kuovdâkiäinust luokamáttáátteijen. Sun jotá siämmáá ääigi meiddei ive pištee Sämmilâšmuusik rävisolmoošškovlittâs -linjâš Ucjuuvâst. ¬–Pággu piergiđ, västid Hildá ko sun smiättá, ete maht sun asta puđâldâsâi lasseen jotteeđ kyevti škoovlâ. Hildá haalijd uápásmuđ pyerebeht muusikân já älgiđ puátteevuođâst muusikmáttáátteijen.

Hildá lii Solju lasseen mieldi aanaarlâš Out Of The Woods -muusikjuávhust. Out Of The Woods ráhtá rock já blues -muusik já Solju ráhtá peeleest pop-muusik. Solju lii rähtimin skiärru, mon pitáh láá iänááš sämikielân. Jurduuh lávluid já luáigusijd šaddeh jyehilágán tiilijn, veikkâpâ luándust jođedijn, avdoin vyejedijn tâi kirje luvâdijn. Hildá lii eskin älgimin muusikrähten já sun lii ávusmielâsâš ereslágán máhđulâšvuođáid. Puátteevuođâst sun kuittag haalijd rähtiđ skiärruid já pyehtiđ sämimuusik uáinusân olgoláá maailmân.

Hildá Out Of The Woodsijn lávástâlmin Anarist.

Liiŋkih:

https://www.facebook.com/soljuofficial

https://www.youtube.com/watch?v=6G-ihjOuICs (Solju: Hold Your Colours)

https://www.facebook.com/officialoutofthewoods   

https://www.youtube.com/watch?v=vySFefC2SpE (Hilda ja Out Of The Woods LIVE)

http://yle.fi/uutiset/taimen_vihastuu_saameksi_musiikkivideolla/6630557

Tekstâ já koveh: Milla Elmiina Pulska

Majemustáá peividum/