Koijâdâllâm lii uáivildum toid virgeomâhijd já virgeomâhij pargeid, kiäid säämi kielâlaahâ heiviittuvá. Västidemäigi lii čohčâmáánu loopâ räi.

Koijâdâllâmluámáttuvvah láá sämikieláid já suomâkielân. Koijâdâllâmluámáttuvvah láá čujottum kieldâ já kieldâovtâstumij, staatâ já almolij haldâttâhsuorgij já sämiornijdumij pargoviehân.

Puoh västidâsah kieđâvuššâjeh luáttámušlávt.

Säämi kielâlaahâ (1086/2003) lii lamaš vyeimist paijeel 10 ihheed. Koijâdâllâm ulmen lii selvâttiđ sämikielâ kevttim virgeomâhâšpalvâlusâin, pargei sämikielâ tááiđu já sämikielâlij palvâlusâi vijđesvuođâ.

Sämitigge čuávu laavâ heiviittem já addel avžuuttâsâid kielâlahâasâttâmân kulleid koččâmâšáid sehe taha aalgâid huámášum epičuággái tivvoom várás.

Čielgiittâsâst ráhtoo raapoort. Čielgiittâsâst já koijâdâllâmluámáttuvvâst addel lasetiäđuid säämi kielâtorvočällee Siiri Jomppanen, puhelin 010 839 3111.