| Säämi kielâlávgumškovliittâsâst uuccâp keevâtlâš máttááttemvuovijd |
|
|
|
Säämi kielâlávgumškovliittâs ovdedeijee škovlimhaahâ juátkoo skammâmáánu 6.-7. peeivi keevâtlâš teemaiguin. Škovlimpeeivij ääigi suogârdâllâp tom, mii lii vaigâd sämikielâ oppâmist já magarij pargovuovijguin párnáid lii máhđulâš finniđ oppâđ já kevttiđ kielâ arâšoddâdmist, škoovlâst já sierâláán kielâpirrâduvâin.
Vástuppeeivi ohjelmist lii ereslasseen Uccjuvnjäälmi škoovlâst kuhháá porgâm luokâmáttáátteijee Inga Guttorm (Oahptii Iŋgá) luvâldâllâm, mii vuáđuduvá sämikielâ oppâm já máttááttem pargovuovijd, maid sun lii pargostis ovdedâ já hárjánmijd, maid sun lii pargostis finnim. Pargovuovijd já hárjánmijd kietâdâllâv luvâlduvâin meid sämikielâlâš luoka máttáátteijee Uccjuuvâst Aura Pieski sehe Maila Vaarala, kii parga Oulust párnáikärdimáttáátteijen. Säämi ollâškoovlâ sämikielâ professor Ánte Aikio seelvât luvâlduvâstis koččâmuš ´Mii lii vaigâd sämikielâ oppâmist?´Siämmáá fáádást sárnu meid Berit-Ellen Juuso, kii pargâ Iänuduvâst sämikielâ lehtorin. Sämikielâ válduaamnâsuáppee Magreta Sara pelestis maainâst oppâčáituspargos vuáđuld sämipárnái vanhemij tavesämikielâ kielâtiileest Iänuduvâst já Anarist. Lávurduv 7.11. ohjelm álgá Aanaar škoovlâ luokamáttáátteijee Petra Kuuva luvâlduvváin, mii kietâdâl anarâškielâ kielâlávgumpárnái máttááttâskiellân. Säämi máttááttâskuávdáá anarâškielâ máttáátteijee Anna Morottaja luvâldâl kielâlávgummetodist rävisolmoošmáttááttâsâst. Aanaar škoovlâ tavesämikielâ máttáátteijee Elle-Máret Näkkäläjärvi uáppist tiätutekniik kevttimân já uđđâláán pargovuovijd máttááttâsâst. Lávurduv uápásmup meid maŋgáid pargovuovijd já oppâmaterialáid, maid máttáátteijeeh láá utkâm máttááttâs várás. Tágáreh láá ovdâmerkkân Iänuduvlâš Maarit Magga tyejimáttááttâs vyevih, Piälduvyeme škoovlâ luokâmáttáátteijee Hellin Pietikäisii Gárddastallan –spellâ, mon sun lii utkâm pargoniävvun matematikmáttááttâsân já anarâškielâ rävisolmoošmáttááttâsâst ennuv kevttum kielâmiäštár- hárjuttâllee –vyehi. Säämi kielâlávgummáttááttâs ovdedeijee škovlim lii Sämitige já Oulu ollâopâttuv Giellagas-instituut ohtsâšpargo já pištá taan ive loopâ räi. Ive 2016 toimâ juátkoo vala reesuurskirje toimâtmáin, kirje kietâdâl säämi kielâlávgummáttááttâs. Kirje kolgâččij almostuđ ive 2016 ääigi. Haavâ ruttâdeijeeh láá máttááttâshaldâttâs já Oulu ollâopâttâh. Ohtsâšpargokyeimin láá meid Säämi ollâškovlâ já Vaasa ollâopâttâh. Haavâst láá mieldi aldasáid 40 sämikieláin pargee arâšoddâdeijed, máttáátteijed já uápped, kiäh loheh máttáátteijen. Škovlim lii kuuđâ (6) akateemisâš uáppučuággá vijđosâš. Máttááttâspargovievâ škovlim lii Sämitiggeest uđđâ toimâsyergi. Ohjelm 6.-7.11.2015 lii luođimnáál täst. Lasetiäđuh Sämitige škovlim- já oppâmaterialtoimâttâh/ vs. škovlimčällee irmeli.moilanen(at)samediggi.fi |
|
| Viimeksi päivitetty ( 22.10.2015 ) |