Nuorâirääđi lii ohtâ sämitige lävdikuudijn, já ton váldulâš pargon lii ovdediđ säminuorâi kielâlijd já kulttuurlijd vuoigâtvuođâid sehe nanodiđ säminuorâi identiteet. Lasseen rääđi valmâštâl sämitiigán iävtuttâsâid, aalgâid, ciälkkámušâid já eres uáivilalmottâsâid, moh kyeskih säminuoráid. Nuorâirááđán kulá tääl vittâ 18-25-ihásij jeessân sehe juáhháá persovlâš värijeessân ja lasseen vittâ 15-17-ihásij äššitobdeejeessân.

Nuorâirääđi lii toohâm sämitiigán iävtuttâs rääđi jeessânmere lasseetmist čiččâmân já jesânij aheraijiittâs muttemist 18-28 ihán. Muttem maŋa äššitobdeejesâneh väljejuvvojeh enâmuštáá vittâ. Ääši meerrid sämitige čuákkim 21.12. Jis rääđi iävtuttâs tuhhiittuvvoo, väljejeh rááđán puáttee pajan iävtuttâs mield 7 jesânid sehe juáhážân persovlâš värijeessân. Jis rääđi iävtuttâs ij tuhhiittuvvoo, väljejeh jesânin vittâ 18-25-ihásij jeessân, nuuvtgo taan räi-uv.

Rääđi jesâneh iä taarbâš leđe sämitige jesâneh, iäge sij taarbâš aassâđ sämikuávlust. Meiddei sämikielâ eenikiellân ij lah págulâš, mutâ sämikielâ táiđu lii tuoivum. Nuorâirääđi valjiimist váldoo vuotân, ete jesâneh ovdâsteh nuuvt viijđeeht sämikuávlu já sierâ kielâjuávhuid ko máhđulâš. Valjiimist mieđettuvvoo meiddei suhâpeelij koskâsâš täsiárvu.

Nuorâirääđi taha sämitige stiivrân iävtuttâs valjimnáál jesânijn, já lopâlâš miärádâs taha sämitige čuákkim.

Uážžuvetteđ iävtuttiđ mielâstâd hiäivulijd 18-28-ihásijd aktiivlijd säminuorâid já äššitobdeejesânin hiäivulijd 15-17-ihásijd nuorâid. Iävtuttâsâid vuáđusijdisguin kalga vuolgâttiđ sämitige nuorâičällei majemustáá 11.1.2016

Iävtuttâsah já lasetiđuh:

Kaisa Tapiola-Länsman

kaisa.tapiola-lansman(at)samediggi.fi

+358 50 382 51 79