Taan ivvááš Kielâtaho-palhâšume lii valmâštâm nuorttâlâš Aune Mettäpuro Čevetjäävrist. Palhâšume lii tyeiji, ciägusärgimuorâiguin rahtum ärbivuáválâš nuorttâlâšráánu.

Säämi kielârääđi mieđeet jyehi nube ive Kielâtaho-palhâšume. Ive 2015 Kielâtaho-palhâšume lii čujottum Mielenterveystalo.fi-oovtâstpargoproojeektân. Kielâtaho-palhâšume ulmen lii adeliđ tubdâstâs sämikielâ sajattuv já sämikielâlij palvâlusâi ovdedem várás tohhum ánsulâš já merhâšittee pargoost Suomâst

”Nuorttâlâšráánu” lii tovle kevttum nuorttâlâš perrust ulloloovdân. Nuorttâlâšráánu lii saavzâulloost rahtum uáli liegâs. Máátkán vyelgidijn ovdâm. puásuiráiđuin kerrisist tâi rievvâst, ráánu siisâ lieggâsân lâi pyeri kiessâđ veikkâpâ uccâ párnáid.

Ärbivuáválálâš nuorttâlâšráánu kođđoo ciägusärgimuorâiguin já tot ráhtoo saavzâ ulloost snäldein ponnum ullolaaigijn. Ráánu ärbivuáváliih ivneh láá vielgâd, čappâd já ruopsâd. Nuorttâlâšráánu algâttem čyeldimpäädist lii epitáválâš; čuožâlääigih kođđojeh čyeldimpáádán, moos šadda nuorttâlâšráánun jiešvuođâlâš ruuvdukovos. Čyeldimpäddi kiddoo ráánumuorâi pajemuorân, mast láá rääigih ráánu algâttem kiddim várás. Ráánu kiäčán šnjirriittuvvojeh nuorttâlâšráánun táváliih nk. ”riävskájyelgi” -párgálduvah.

Tááláá ääigi taat nuorttâsämmilij ärbivuáválâš ráánu lii táválávt heŋgâstum siäinán.

(Kove: Anni Näkkäläjärvi)