Kištoost iä lamaš aheraijiittâsah. Meriááigán pottii 27 jieškoteuvlágán kirje, main kulmâ lijjii tavesämikielâliih, Power Point –ohjelmáin rahtum cd-kirjeh. Tavesämikielâliih pävirkirjeh lijjii 17, aanaarsämikielâliih 4 já nuorttâsämikielâliih 3.

Tavesämikielâlâš kiirjijd árvuštâlâi Ruotâ sämitaaidâr, kirječällee já máttáátteijee Inghilda Tapio. Suu mielâst vyeitte valjim lâi vaigâd, ko maaŋgah kirjeh lijjii fijnáh já huolâlávt rahtum. Sun árvuštâlâi meiddei máhđulâšvuođâid teddiliđ já almostittiđ kiirjijd.

Nuorâbij kirječällei kiirjijn palhâšuvvoo Avveel vyeiliškoovlâ 0-2 luokkalâš Máidnasat mánuid mielde. “Uáli fiijnâ kirje, mon kolgâččij teddiliđ. Fiijnâ koveh já onomatopoeetlâš tekstâ taheh kirjeest uáli kiäldulii. Kirje vievâst lii älkkee oppâđ mánuppoojij sämikielâlâš noomâid”. Nubben taan juávhust palhâšuvvoo Aanaar vyeliškoovlâ 3-4 luokkalij Manin nu lea? “Hitruus já kiäldulâš muštâlusah ucebáid párnáid. Fiijnâ koveh muštâleh fiäránijn”.

Váhá sruárráábij párnái kiirjijn palhâšuvvojeh Kärisavvoon škoovlâ 6. luoka Ellen-Máret Juuso Geatki ohcá iežas bearráža já Kärigâsnjaargâ škoovlâ 6. luokkalij Mánná duoddaris, mast “muštâluš lii suámi já koveh fiijnáh. Tast lii meiddei nk. ruopsis läigi mii tuálvu mainâs ovdâskulij.”

Ellen-Máret Juuso kirje lii meiddei “keččei jiellâh” Hettaast. Tapio mielâst kirjeest lii šiev maainâs, fiijnâ koveh já ruopsis läigi. Kirjeest lii tehálâš teema: “ohtuunâsvuotâ ij lah suámi, mut mainâs uccâ kiäđháš kávná kuittâg ustevijd!” Stuárráábij párnái kiirjijn palhâšuvvoo Aanaar vyeliškoovlâ 6. luoka Vierccain vuitui. “Kirjeest lii ruop-sis läigi. Tom lii älkkee luuhâđ já tast láá tuođâi-uv fiijnâ koveh. Hitruus muštâluš mon piäsá povvâstiđ.” 

Avveel vyeliškoovlâ 3-6 luokkalij Gonagasa gollit já stáluid silbbat palhâšuvvoo eromâš taaidâlâšvuođâs keežild. Tapio mielâst kirje heivee teddilemnáál eromâšávt uánihis muštâlusâi áánsust.

Nuorttâsämikielâlâš kiirjijd luuvâi Satu Moshnikoff, kote lii almostittám maaŋgâid kiirjijd já porgâm ennuu mávsulâš pargo nuorttâsämikielâ oovdân. Suu iävtuttâs mield palhâšume adeluvvoo kuálmádluokkalâš Juuso Fofonoff kiirjám Sää´m jânnan rock´s, mast lii äigikyevdilis arttâ já ennuu mielâkuvviittâs. Čällee heivit madâräijihijn ärbejum luodâi tubdâmtiäđu tááláá ááigán puorij putusijguin. Moshnikoff avžut kirje rähtee juátkiđ pyereest álgám čäällim!

Aanaarsämikielâlâš kiirjijd árvuštâlâi kirječällee já taaidâr Aune Kuuva, kiän iävtuttâs mield palhâšume adeluvvoo Aanaar vyelitääsi 5-6 luokkalij Marjut Ahvenlampi, Pekka Moilas, Riikka Morottaja, Anne Seipiharju já Jussá Seurujärvi kiirján Lappum uábbi. Kirjeest lii hitruus já kiäldulâš muštâlus já uáli fiijnâ koveh. Mainâsist láá ennuu tábáhtusah já tast lii fantasia.

CD-kiirjijd árvuštâlâi Sämitige škovlim- já oppâateriaaltoimâttâh. Kilbišjäävri škoovlâ diačáitálmâs Olbmot ovdal min finnij enâmustáá plus-meerhâid. Kirje lii uáli kreatiivlâš, tot leehâst uđđâ oovdânpyehtimvuovijd já taha historjá oppâmist mielâkiddiivâš. Tast láá ennuu fiijnâ koveh, šiev já taaidâlâš ideah já čuálččáás iivneh. Spontaanlâš já mielâkiddiivâš oovdânpyehtim, mon lii lamaš vissásávt hitruu porgâđ! Oovdânpyehtim heivee teemamateriaalân historjá máttááttâsân. Miinusân puáhtá mainâšiđ kirje noomâ, mon ferttee molsođ, ko siämmáánommâsâš hirtorjá kirje lii juo lemin!

SÄMITIGGE TUÁIVUT LUHO JÁ ČÄÄLLIMMOOVTÂ PUOHHÁID NUORÂ KIRJEČÄLLEID JÁ HÁSTÁ SII AINUV OVDEDIĐ ČÄÄLLIMTÁIDUIDIS! SÄMITIGGE KIJTTÁ SÄMIMÁTTÁÁTTEIJEID ŠIEV STIVRIIMIST JÁ PÁRNÁI JÁ NUORÂI MOOVDITMIST!

Sämitigge tuáivut uáppeid já máttáátteijeid pyeri keesi!

 Maccâp čohčuv škoovlâi älgim maŋa puáttee kiiđâ taaidâtábáhtus teemaid, moh láá teatter já elleekove.