Guttorm lii hoittám áávusorroo virge ton rääjist, ko Heikki J. Hyvärinen paasij iäláttâsân. Guttorm vuoitij jienâstmist vuoigâdvuođâtiettuu kandidaat Siiri Jomppas jienâiguin 11-9. Viirgán uccii puohnâssân nelji ulmuu, main ohtâ kiäsádâdâi kištoost ovdil valjim.

Sämitige lahâčällee lii juuriidlâš-haaldâšlâš virgealmai, kiän pargoid kuleh el. valmâštâllâđ sämmilij vuoigâdvuođâsajattuv kyeskee aašijd tegu ciälkkámušâid, oovdânpyehtimijd, peleväldimijd, muštottemčalluid já motomin joba asâttâsiävtuttâsâid. Lasseen lahâčällee tuáimá Sämitige iäláttâs- já vuoigâdvuođâlävdikode oovdânpyehten já čällen.

Sämitige čuákkim pištij vuossaargâ koskâiijâ räi. Lahâčällee valjim lasseen meridij čuákkim tááláá vaaljâpaje toimâohjelmâst, ekonomiavuáváámist já tuhhiittij moonnâm ive ruttâtuálulopâttem. Eres ääših sirdojuvvii puátteid čuákkimáid.