Säämi parlamentaarlâš rääđi saavâjođettemvuotâ Ruotân |
![]() |
![]() |
Säämi parlamentaarlâš rääđi saavâjođetteijee-enâmin puáttee kyevti ive ääigi tuáimá Ruotâ. Jođettemovdâsvástádâsvuotâ sirdâšuvá Ruotâ sämitiigán Taažâst, mon sämitige saavâjođetteijee Egil Olli luovâttij Ruotâ sämitige saavâjođetteijee Lars Anders Bæerin SPR tievâsčuákkimist Ruávinjaargâst 29.10.
Tave-eennâmlâš sämitigeh hoittájeh Säämi parlamentaarlâš rääđi saavâjođettemvuođâ vuáruttuvâi kyevti ive poojijn. Ovdâsvástádâs čäällimkode tooimâst čuávu mieldi.
Suomâ sämitige saavâjođetteijee Klemetti Näkkäläjärvi (Juvvá Lemet) tiäduttij tievâsčuákkimist toollâm sänivuárustis SPR merhâšume eromâšávt tääl, ko staatah oovtâst sämitigijguin valmâšteleh Tave-eennâmlâš sämisopâmuš vuáimán jođettem. Tave-eennâmlâš sämisopâmuš tuhhiittem Suomâst, Taažâst já Ruotâst kulá Säämi parlamentaarlâš rääđi váldu-ulmijd älgee toimâpaajeest 2008-2010.
Algâaalmugij vuoigâdvuođah láá kuávdášlâš sajattuvâst Säämi parlamentaarlâš rääđi pargoost. Sämitigeh láá lamaš aktiivlávt mieldi oovdedmin moonnâm ive (2007) OA almosčuákkimist tuhhiittum algâaalmujulgáštâs. Parlamentaarlâš rääđi ovdâsteijeeh láá meiddei uásálistám OA algâaalmugašij pisovâš foorum (UN Permanent Forum on Indigenous Issues) čuákkimáid SPR vuáđđudmist, 2000-lovo aalgâ rääjist.
Säämi parlamentaarlâš ohtsâšpargo tehálâš ulmeh láá meiddei sämikielâ kyeskee lahâasâttem harmonistem jieškote-uv enâmijn, säämi kielâohtsâšpargo uđđâsist ornijdume, sämimáttááttâs nanodem eromâšávt vuáđuškoovlâin, oppimateriaalohtsâšpargo ovdedem já säminuorâi uásálistem- já vaikuttemmáhđulâšvuođâi pyeredem. Säämi ollâškoovlâ ovdedem säämi ollâopâttâhân kulá meiddei parlamentaarlâš rääđi tiäddučuágástâhsuorgijd.
Säämi kielâlävdikoodán, mii joođeet säämi kielâohtsâšpargo já mast láá ovdâstum puoh sämikielah, nomâttuvvojii pajan 2008-2011 Suomâ ovdâsteijee jesânin: tavesämikielâ Vesa Guttorm (väärrin Petra Biret Magga), aanaarsämikielâ Petter Morottaja (Ilmari Mattus), nuorttâsämikielâ Erkki Lumisalmi (Jouni Moshnikoff). |
|
Viimeksi päivitetty ( 30.10.2008 ) |