Tave-eennâmlâš säämi kielâpalhâšume Kollekielâ juohhui koskoho 12. skammâmáánu Helsigist kuáhtásân sämikielâ oovdedmist ánsulum piälán. Sturuduvâs peeleest 12 500 euro árvusâš palhâšume juovvijn Ucjuv sämiservi Sámi Siida sehe uumajasämikielâ máttáátteijee já kielâpargee Henrik Barruk.

Palhâšume keigij riehtiminister Tuija Brax sämiaaššijn västideijee ministerij já sämitigij saavâjođetteijei čuákkim ohtâvuođâst. Riehtiminister Brax lasseen tilálâšvuođâst lijjii Ruotâ eennâmtuáluminister Eskil Erlandsson sehe sämitigij saavâjođetteijeeh Egil Olli Taažâst, Lars-Anders Baer Ruotâst já Klemetti Näkkäläjärvi Suomâst.

Kielâpalhâšume sämikielâ oovdedmist, mii juáhhoo jyehi nube ive, mieđettuvvoo ovtâskâs ulmui tâi siärvádâhân Taažâst, Ruotâst, Suomâst tâi Ruošâst.

Sámi Siida -servi ánsášij palhâšume kuhesáigásâš pargoost sämikielâ pyerrin Ucjuv kieldâst. Servi lii merhâšitteht vaikuttâm sämikielâ sajattuv pyereedmân Ucjuuvâst. Servi lii meiddei ovttuu prioristám sämikielâ jieijâs tooimâin. Ovdâmerkkân párnáid já nuoráid čujottum tooimâst sämikielâ lii áinoo kevttum kielâ. Sámi Siida saavâjođetteijee Kati Eriksen vaaldij vuástá palhâšume.

Ruotâ sämmilâš Henrik Barruk lii porgâm kyehtlov ihheed uumajasämikielâ naanoodmân, mii lâi masa jo lappuumin. Barruk lii toimâm kuhháá uumajasämikielâ máttáátteijen. Ton lasseen sun lii porgâm dokumentistempargo já pyevtittâm teevstâid, sänivuárháid já sujâttemkaavaid uumajasämikielâ máttáátâs várás.

Kollekielâ-kielâpalhâšume ulmen lii vaikuttiđ sämikielâ oovdedmân tâi siäilumân Taažâst, Ruotâst, Suomâst já Ruošâst. Stuáruduvâs peeleest 12 500 euro árvusâš palhâšume puáhtá jyehiđ maaŋgâi vyeittei kooskâ. Palhâšume juohhui vuossâmuu keerdi ive 2004.

Suomâst taan ive juohhum palhâšume ruttâdáin máttááttâsministeriö já riehtiministeriö.