Unna Junná lii YLE Sámi Radio sämikielâlâš párnái TV-ohjelm. Unna Junnáást lii oovtâstpargo meid Ruotâ televisio sämitoimâttâs SVT-Sápmijn já Taažâ almosradiofinnodâh NRK sämikielâlâš párnái TV:in eres lasseen materiaal loonootmist.  

Ovdil ko sämikielâlâš párnái TV algâttij tooimâs Suomâbeln, kiergânii maaŋgah páárnášsuhâpuolvah rävisulmui ahan. Juurdâ sämikielâlijn párnái TV-ohjelmijn šoodâi jo kuhháá tassaaš. Taažâst sämikielâliih párnái TV-vuolgâttâsah algii ive 1991. Ruotâst sämikielâlâš párnái TV Meahcce Vulle algâttij ive 1994.

Meid Suomest tahhojii alguuh sämikielâlijn párnái TV ohjelmijn jo 90-lovvoost eres lasseen Yleisradio haldâttâsrááđán. Yleisradio kuittâg västidij talle, et sämikielâlâš párnái ohjelmáid iä lamaš ruuđah ige vuolgâttâsäigi.  

Juurdâ sämikielâlijn párnái ohjelmijn lâi kuittâg nanosin sämmilij mielâin. Ive 2005 NRK, SVT já YLE algâttii ráđádâlmijd ohtsijn párnáiohjelmijn. Yleisradio kiäsádâđâi oovtâstpargoost ovdil ko ohjelmeh šoddii tuottân. Ive 2006 aalgâst NRK já SVT algâttáin ohtsijd sämikielâlijd párnái TV-vuolgâttâsâid Taažâst já Ruotâst.  

Suomâ pele sämmilâšpárnááh paccii ain-uv nuuvtá jieijâskielâlijn ohjelmijn. Toos iä sämmilâšvaanhimeh já –párnááh puáhtám tuuttâđ, pic oovdedškuottii ääši. Loppuive 2006 sij uárnejii mielâčáittus Helsigist, moos čokkânii maŋgâlov párnážid vaanhimijdiskuin. Siämmáá määđhist sij teivâdii meid Yleisradio haldâttâsrääđi jesânijd, aalmugovdâsteijeid já Yleisradio hoovdâid.  

Vaanhimij já párnái tooimâst lijjii meiddei puátuseh. Kuáhtám maŋa haldâttâsrääđi jesâneh čokkânii já meridii, et ääsi kalga tipšođ. Sämipárnááh kolgii peessâđ keččâđ TV-ohjelmijd jieijâs kielân já nuuvt tábáhtui-uv. Vuossâmuš Unna Junná ooinij peeivičuovâ čohčâmáánu 16. peeivi 2007. Ohjelm rahtui ive 2010 loopâ räi oovtâstpargoost SVT Sápmijn.

Irene Länsman, Penu, Niillas Holmberg, Terhi Koivisto, Mihkku Laiti já Ritva Torikka Unna Juná kuvviimijn Ucjuuvâst. Kove: Yle Sámi radio /Onneli Halonen.

Unna Junná vuolgâttuvvoo Suomâst TV-2:st pasepeeivij tme 7.45 já uđđâsist FST5-kanavast tme 08.15. Ohjelmeh láá rahtum ihásávt 30; 15 kiđđâ- já 15 čohčâpaajeest. Ive 2011 aalgâ rääjist YLE Sámi radio já SVT Sápmi lává ráhtám sierânâs párnáiohjelm. Unna Junná paasij YLE Sámi Radio pyevtittem párnáiohjelmân já tom rähtih ivveest 15 ohjelmâd, moh vuogâttuvvojeh kiđđâpaje ääigi.

Unna Juná ohjelmlaiđiisteijen algâttáin čohčuv 2007 Petra Magga já Sofia Jannok. Sunnuu lasseen Unna Juná láá tavesämikielân laiđiistâm tai iivij ääigi še Simon Issát Marainen, Maret Steinfjell, Per-Josef Idivuoma já Oula Guttorm. Tääl Unna Juná laiđiisteh tavesämikielân Irene Länsman, Niillas Holmberg já Anna Näkkäläjärvi, aanaarsämikielân Heli Huovinen já nuorttâsämikielân Anna-Katariina Feodoroff já Leena Fofonoff.

Unna Junnáást uáinip ärbivuáválii tuoijum. Avveel nuorttâsämikielâ kielâpiervâlist Tiina Sanila-Aikio, Janna Marja Semenoff Iina Tarkiainen já Masi Valtonen. Kove: Yle Sámi radio.Unna Junnáást uáinip ärbivuáválii tuoijum. Avveel nuorttâsämikielâ kielâpiervâlist Tiina Sanila-Aikio, Janna Marja Semenoff Iina Tarkiainen já Masi Valtonen. Kove: Yle Sámi radio.

Unna Juná toimâttâs Anarist:

Juhani Nousuniemi, västideijee pyevtitteijee

Ritva Torikka, toimâtteijee-pyevtitteijee

Kirsti Länsman, toimâtteijee

Joonas Saari, kovvejeijee-čyeppee  

Liiŋkah:  

YLE Sámi radio

NRK Sámi radio - párnái TV

SVT Sápmi - párnái TV

Maahisweb - Sämimuseo Siijdâ párnáisiijđoh

Cugu