já eellim elimâm 16 vuossâmuu ihheed Ucjuuvâst, suomânieidâ uáivičohheest tassaaš, ko värrejim Tamperen luuhâđ. Ožžum saje Tampere olgosadelemtááiđu sierânâsluvâttuvâst, mast uáivilâm lii lamaš ovdediđ muusik, kirjálâšvuođâ já čaittâlem táiđuidâm nuuvt pyerrin ko máhđulâš, vâi puávtáččim paijeentoollâđ já ovdediđ jieččân kulttuur. Varrim sämikuávlust meddâl merhâšij tiäđust-uv stuorrâ nubástus elimân. Stuárráámus äšši varriimist lâi kuittâg tot, et ibbeerdškuottim pyerebeht, maid sämmilâšvuotâ munjin meerhâš. Motomin ferttee moonnâđ olgoláá vâi uáiná.

Toh, kiäh láá lamaš motomin kuhháá meddâl pääihist perruuttáá já maccâm tastoo pááikán, pyehtih identifisistuđ munjin, ko must koijâdeh, maid sämmilâšvuotâ munjin meerhâš. Tot lii tobdo, mon lii väädis valdâttâllâđ. Kieskâd valmâštum tihtâkirjestân taat lii kuittâg lamaš ohtâ muu viggâmuš. Kirje ličij uáivil almostittiđ puáttee ive pelni. Čálám tavesämikielân, mii lii muu eenikielâ. Ko lijjim Tamperest, te oroi ohtânmaanoost tagarin, tegu liččim vuálgus monnii eres ooláádmuddoost, kuus puávtám ain táárbu mield patâriđ, já miiba tađe pyereeb tobdo! Maŋgâsân muu vyelgim Tamperen, s. 1100 kilomeetter kiäčán pääihist, lii lamaš koččâmâšmerkkâ. Motomij mielâst lam tegu hilgom madduidân, patârâm meddâl. Äšši lii eidu nubijkejij. Sämmilâšvuotâ, Säämi já sämikielâ láá piäiválávt muu mielâst. Tuubdâm, et lam vuálgám meddâl, vâi puávtám puáttiđ maasâd styerebin, vâi muu išedeijee kietâ ličij stuárráb.

Puohnâssân lam tuođâi čiävláá sämmilâšvuođâstân, jiemge hepânâš tom. Ij koolgâ leđe rámmáá, mut ij lah puástud leđe čiävláá tast, maid lii já moos kulá. Hepânâššâm lii majemuu ihečyeđe ääigi oinum aaibâs tuárvi.