Sämitige asâttem ohtsâšpargo-orgaan čokkânij taan vaaljâpaje vuosmuu čuákkimân Anarân 27. vyesimáánu. Ohtsâšpargo-orgaanist láá ovdâstum máttááttâsministeriö, máttááttâshaldâttâs, Laapi läänihaldâttâs, sämikuávlu kieldah já sämitigge. Ohtsâšpargo-orgaan pargon lii ovdediđ sämikielâ já sämikielâlâš máttááttâs oovdedmáin ohtsâšpargo já ohtâvuođâtoollâm sehe pyereedmáin tiäđujotteem sämimáttááttâs jieškote-uv peelij kooskâ.

Máttááttâsneuvos Leena Nissilä puovtij tiervuođâid mattááttâshaldâttâsâst já muštâlij el. cuáŋuimáánust asâttum vuáđumáttááttâs tijmejuáhupargojuávhu pargoost. Máttááttâsministeriö lii adelâm pargojuávkun ääigi keesi 2010 räi, mon maŋa lii meerrin pieijâđ joton väldikodálâš máttááttâsvuávám vuáđustâsâi uđâsmittem. Ovdebâš máttááttâsvuávámuđâsmittem valmâštui ive 2004.

Sämmilij škovlimašij ohtsâšpargo-orgaan čokkân čuávvoo keerdi čohčuv 2009. Talle äššilistoost láá el. sämikielâlâš oppâmateriaal tile já táárbuh, máttááttâsvuávám vuáđustâsâi uđâsmittem ja kuávluhaldâšem uđâsmittem. Ohtsâšpáárgon meriduvvojii povdiđ fáárun meiddei Oulu já Laapi ollâopâttuvah.