Säämi parlamentaarlâš rääđi jođettem sirdâšui Suomân |
![]() |
![]() |
Suomâ sämitige saavâjođetteijee Juvá Leemit, Klemetti Näkkäläjärvi tuáimá Säämi parlamentaarlâš rääđi saavâjođetteijen puáttee kyehti ive ääigi. Saavâjođettem sirdâšui Suomâ sämitiigán Ruotâ sämitiggeest.
Kuuvijn Ruotâ sämitige stiivrâ saavâjođetteijee Sara Larsson, Taažâ sämitige värisaavâjođetteijee Laila Susanne Vars já Suomâ sämitige saavâjođetteijee Klemetti Näkkäläjärvi. Koveh: Sára Márjá Magga.
– Lii ilo adeliđ saavâjođettem tiileest, mast sämiääših láá puátimin eromâš tarkkum čuásáttâhhân OA:st, páhudij Ruotâ sämitige saavâjođetteijee Sara Larsson parlamentaarlâš rääđi čuákkimist Ruávinjaargâst 14.4.
Säämi parlamentaarlâš rääđi lii vuáđudum 2000-lovo aalgâst já tot tuáimá Tave-enâmij sämitigij oovtâstpargo-orgaanân. Meid Ruošâ sämmiliih uásálisteh rääđi paargon. Parlamentaarlâš rääđi čokkân Ruávinjaargâst já uážžu kyessin OA algâaalmugij olmoošvuoigâdvuođâi sierânâsraportistee James Anaya. Sierânâsraportistee lii vuossâmuu keerdi olmoošvuoigâdvuođâvuáháduu historjást vaalmâštmin sierânâs raapoort aalmugist, mii áásá neelji väldikoddeest. Olmoošvuoigâdvuođâraporteh láá lamaš ovdeláá staatâkuáhtásiih.
Sierânâsraportistee kolliimân kuulân uárnejuvvoo Ruávinjaargâst sämmilij olmoošvuoigâdvuođâid já jiešhaldâšem olášume kiređâvuššee konferens koskoho 15.4. Tave-enâmij sämitigeh raportisteh sämmilij sajattuvâst jieijâs päikkiriijkâin. Staatâi haldâttâsâi ovdâsteijeeh láá konfereensâst oovdânpyehtimin staatâi uáinimčievâ já västidmin sämitigij toohâm koččâmâššáid já savâstâlmáid.
Vástuppeeivi 16.4. piäsá meiddei säämi aalmuglâšohtsâškodde ađai säämi seervih já ornijdumeh oovdânpyehtiđ uáinuidis sierânâsraportistei. Sierânâsraportistee kolliimân lohtâseijee aalmugijkoskâsii konferens teeman láá sämmilij jiešmeridemvuoigâdvuotâ algâaalmugin, eennâm-, čäci- já luánduriggodâhvuoigâdvuođah, párnááh já nuorah eromâšávt kielâ já máttááttâs uáinimčievâst sehe olmoošvuoigâdvuođâsopâmušâi kocceem já meriáigásâšraportistem jieškote-uv riijkâin. |
|
Viimeksi päivitetty ( 18.04.2010 ) |