Kuuvijn Suomâ sämitige jesâneh Tuomas Aslak Juuso já Asko Länsman sehe värisaavâjođetteijee Erkki Lumisalmi. Koveh: Sára Márjá Magga. 

– Pyehtip ilodiđ tast, et sämisopâmuš kyeskee ráđádâlmeh älgih já äšši ovdán, páhudij Taažâ sämitige värisaavâjođeteijee Laila Susanne Vars säämi parlamentaarlâš rääđi čuákkimist Ruávinjaargâst 14.4. 

Säämi parlamentaarlâš rääđi čuákkim tuhhiittij julgáštâs tave-eennâmlâš sämisopâmuš oovdedmist ráđádâlmij älgidijn. Iävtuttâs Suomâ, Ruotâ já Taažâ ohtsii tave-eennâmlâš sämisopâmuššân valmâštui täid staatâid já sämitiigijd ovdâstâm äššitobdeepatgojuávhu pargo puátusin ive 2005. Parlamentaarlâš rääđi váátá tääl, et älgee ráđádâlmáid kolgâččij asâttiđ pištee já tuhhiittettee äigitavlu.

Parlamentaarlâš rääđi tiädut jieijâs julgáštâsâst tom, et ko sämisopâmuš šadda tuhhiittuđ, lii tot kuittâđ epitievâslâš nuuvt kuhháá ko Ruošâ sämmiliih láá ton ulguubeln. Parlamentaarlâš rääđi tuárju Ruošâ sämmilij viggâmušâid jieijâs ovdâsteijee orgaan vuáđđudmân já avžut meiddei Suomâ, Ruotâ já Taažâ haldâttâsâid tuárjuđ Ruošâ sämmilij viggâmušâid.

Tave-eennâmlâš sämisopâmuš uáivilin lii el. toohâđ ohtâlâžžân sämmilij vuoigâdvuođâsajattuv päikkiriijkâinis já nanodiđ sämmilij máhđulâšvuođâid toimâđ riijkâ raajij paijeel já siäiluđ ohtân aalmugin.