Aalmugijkoskâsávt miänástum sämmilâšmuusikjuávkku Adjágas puátá porgemáánust Anarân Ijâttis ijjâ – algâaalmugij muusiktábáhtus váldulávdástellen.

– Konsert lii Adjágas vuossâmuš Suomâst. Ijâttis ijjâ -festivaalorganisaatio lii ilolâš, ko uážžu vuástáväldiđ tábáhtusân návt merhâšittee sämmilâšmuusikjuávhu já et sii muusik kuullâp viijmâg-uv Suomâ sämikuávlust, rámmoo festivaaljođetteijee Anna Näkkäläjärvi.

Adjágas ovtâstit musikkistis tavesämmilii juáigus já modernijd muusiklâš iivnijd. Juávhu majemuš almostittem lii album Mánu rávdnji (2009), mon ovdedij juávhu deebyytskiärru Adjágas (2006). Adjágas lávdástâlâi Vancouver olympialij kulttuurohjelmist já lii uáli pivnohis juávkku nuuvt päikkienâmist Taažâst, ko aalmugijkoskâsávtuv.

Ive 2010 teeman oohtânkulluuvâšvuotâ

Ijâttis ijjâ, mii uárnejuvvoo čiččâd kerd, škáájá Aanaar kirkkosiijdâst 20.–22.8.2010. Festivaal lii vuáháduttám sajattuvâs tehálumosin sämimuusiktábáhtussân Suomâst. Festivaal teeman taan ive lii algâaalmugij oohtânkulluuvâšvuotâ. Algâaalmugeh puátih Anarân kuulmâ sierâ nannaamist já kulttuurij kuáhtám lii áinoošlajâsâš festi-vaal historjást.

Ijâttis iijâ váldutábáhtus lii Ijâttis iijâ –konsert, mii uárnejuvvoo lávurduv 23.8. Tast kuullâp Adjágas muusik lasseen algâaalmugkuosij muusik, ärbivuáválij säämi vookaalmusikšlaajâi lávdástelleid sehe säämi räp Amocist já Ailu Valleest já ennuv eres-uv sämimuusik.

Ijâttis ijjâ –tábáhtus uárnejeh oovtâst Anára Sámisearvi, Sämitigge, Säämi máttáátâs¬kuávdáš, Sämiuseo Sijdâ, Aanaar kieldâ, Giellagas-instituut já Aanaar servikodde.

Uábbám, viljâm!

Lasetiäđuh festivaaljođetteijee Anna Näkkäläjärvist, Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen. , 0408400383 já tábáhtus internetsiijđoin čujottâsâst www.ijahisidja.fi.