| Sämitigge almostit kyehti uđđâ sämikielâ aabis |
|
|
|
Sämitigge uárnee uđđâ anarâš- já tavesämikielâlâš aabis almostittemtilálâšvuođâ Anarist Siijdâ auditoriost majebaargâ 07.09.2010 tme 12.00. Tilálâšvuođâst oovdânpuáhtojeh uđđâ anarâš- já tavesämikielâliih aabiseh. Anarâškielâ aabis kietâčällee já tavesâämikielâlii aabis kietâčällee, kovvejeijee já máccoo láá mieldi já muštâleh aabisist já ton valmâštâllâmpargoost.
Muu aabis, čohčâ Matti Morottaja čáállám já uŋgárlii Daniel Gelencsér kuvvim Muu aabis, čohčâ -čohčâaabis lii uáivildum 1. luoka čohčâluuhâmpaje anarâškielâ eenikielâ oppâkirjen. Maŋeláá kiirján kárván kiđđâuási já hárjuttâskirje. Ko anarâš kielâpiervâltooimâ puátusin šoddii anarâškielâliih luokah, te lâi velttidmettum pyevtittiđ meiddei eenikielâlâš algâmáttáátâs várás materiaal. Ovdeláá pyevtittum materiaaleh lijjii čäällimvyevis peeleest puárásmâm, ige taid innig puáhtám kevttiđ tagarin máttááttâsâst. Matti Morottaja kietâčäällimpargo puátusin almostittoo tääl digitaalteddilâssân Muu aabis, čohčâ-kirje. Anarâškielâ aabiseh láá kárvánâm kuuloold: vuossâmuš anarâškielâ aabis lâi kirkkohiärrá Edvard Wilhem Borg toimâttâm Anar sämi kiela aapis kirje, mii teddilui Oulust ive 1857. Kirjeest valdui uđđâsistteddilâs paijeel 100 ihheed maŋeláá ive 1983. Ive 1990 almostui anarâškielân tavesämikielâst jurgâlum Aabis 2-kiđđâaabis.
Áppes – Min meahci máidnasat Aaibâs čohčâmáánu algâpeeivijn finnip teddilâsâst Inga Guttorm čáállám já Salli Parikka kuvvim Áppes – Min meahci máidnasat -aabis. Kirje máccumist västid Minna Saastamoinen. Kiirján kárván škovlâihán maŋeláá ive 2011 meid hárjuttâskirje. Kietâčällee Inga Guttorm lii máttáátteijee, kote lii porgâm maaŋgâid iivijd tavesämikielâlii algâmáttááttâsâst Ucjuuvâst. Kirje kovvejeijee, Salli Parikka (Wahlberg), lii kuvvim maaŋgâid párnáid já nuoráid uáivildum kiirjijd (www.salliparikka.com). Máccoo Minna Saastamoinen lii tatavesämikielâ táiđusâžžân palvâlâm oppâkirjekuástideijeid meiddei Taažâst. Ovdebâš Áppes 1 já 2 -aabis almostittui Suomâst 1980 -lovvoost.
Nuorttâsämikielâ aabispargo lii pieijum joton Taan kiiđâ vuolgij joton meiddei nuorttâsämikielâlii aabis kietâčäällimpargo. Tiina Sanila-Aikio lii valmâštâllâm kietâčáállus já pargo kárvánâš loppâivveest. Nuorttâsämikielâlii kielâpiervâltooimâ puátusin lii vyerdimist, et uđđâ vuosâluokkaliih nuorttâsämikielâ máttááttâsân láá puátimin čohčuv 2011. Ulmen lii finniđ aabis jo tai uđđâ vuosâluokkalalij kiävtun.
Tilálâšvuotâ lii rijjâ puohháid, kiäh tobdeh mielâkiddiivâšvuođâ aabisáid. Median lii väridum náhđulâšvuotâ toohâđ koččâmâšâid rähteid já kuástideijei. Tilálâšvuođâst kuásuttuvvoo käähvi.
Hannu Kangasniemi, oppâmateriaalčällee hannu.kangasniemi(at)samediggi.fi, 010-839 3115 Lasetiäđuh: www.samediggi.fi > Olgosadalduvah > Oppâmateriaal |
|
| Viimeksi päivitetty ( 06.09.2010 ) |
