Säämi kielâtaho -palhâšumáin adeluvvoo tubdâstâs sämikielâlij palvâlusâi já sämikielâ sajattuv oovdedmân toohum ánsuliist pargoost Suomâst. Säämi kielâtaho -palhâšume lii säämi tyeji já diploom. Palhâšume keigejuvvoo sämikulttuur suojâlem Suomâst -seminaar ohtâvuođâst Levist vástuppeeivi tme 12.00.

– Tuáivim, et palhâšume movtijdit Meccihaldâttâs juátkiđ sämikielâ sajattuv ovdedem siärvaduvâst já movtijdit uásild meiddei eres-uv virgeomâháid pyerediđ jieijâs sämikielâlijd palvâlusâid, iätá säämi kielârääđi saavâjođetteijee Erkki Lumisalmi.

Sämikieltáiđusij ulmui rekrytistmijn – aasâtmáin sämikielâ tááiđu virgehoittám iähtun tâi ánsun – puáhtá pyerediđ luánduláin vuovvijn jieijâskielâlijd palvâlusâid. Sämikielâi puátteevuođâ turviimân lii tehálâš, et sämikielâlijn palvâlusâin tahhoo luándulâš, uáinojeijee já čielgâ uási virgeomâhâštooimâ, palvâlusâid já rekryttistim.

Sämitige vuáđustâsah

Sämitige mielâst Meccihaldâttâs lii ánsulávt olášittám säämi kielâlaavâ kenigâsvuođâid já ovdedâm sämikielâ sajattuv viärmádâhviestâdmistis, äššigâšpalvâlusâinis já tieđettemtoimâinis. Virgeomâhâšpalvâlusah láá almostittum távjá kirjálâžžân; Meccihaldâttâs fáálá tágárij äššigâšpalvâlusâi lasseen meiddei sämikielâlâš palvâlus. Tot lii pálkkááttâm sämikielâlii tieđetteijee.

Sämitige mielâst Meccihaldâttâs lii toimâm ovdâmerhâlávt sämikulttuur ärbitiäđu siäiluttem pyerrin sämikielâlâlij päikkinoomâi nuurrâm- já almostittemtoimâinis. Sii almostittem čielgiittâs Nuorttâ-Aanaar sämikielâlijn päikkinoomâin lii eromâš tehálâš nuorttâ- já aanaarsämikielâi kulttuurlâš luándun kullee tiäđu siäilumân.

Sämitigge tuáivu, et palhâšume mield Meccihaldâttâs viggá pyerediđ ovdiist-uv eromâšávt aanaar- já nuorttâsämikielâlijd palvâlusâid tohâmáin tain uási Meccihaldâttâs luándulii tooimâ.

Palhâšume lii säämi tyeji

Säämi kielâtaho – palhâšume säämi tyeji, mon rähtee lii valjim Sami Duodji ry. Palhâšume lii tyeji, suáhipäähist rahtum kääri já ton lii ráhtám tuáijár, lehtor Ilmari Laiti Anarist.

Gielladahku | Kielâtaho | Ǩiõlltuâjj | Kieliteko diplomi 2010 (PDF)
Gielladahku | Kieliteko vuođuštusat | vuáđustâsah | vuâđđjurddi | perustelut (PDF)  
Gielladahku | Kielâtaho | ǩiõlltuâjj | Kieliteko. Gárri | Kääri | Kää´rr | Kaara (PDF)  

Lasetiäđuh: kielâtorvočällee Siiri Jomppanen. puh 010 839 3111, ovdânommâ.suhânommâ@samediggi.fi