Sämitige sämikielâ toimâttuv (maŋeláá kielâtoimâttâh) palvâlemmáávsuh pajaneh 1.1.2011 rääjist. Jurgâlempalvâlusâi máávsuh pajeduvvojeh 45 eurost 65 euron. Jurgâlempalvâlusah

Kielitoimâttuv adelem jurgâlusâst piärroo máksu suomâkielâst sämikielân teikâ nubujkejij 65 eurod siijđost 2000 merkkâd, moos iä kuulâ koskâmeerhah. Kielitoimâttuv eres palvâlusah láá tulkkumpalvâlusah já eres kielâliih palvâlusah. Palvâlemmáávsuh láá ovdebáá keerdi pajejum ive 2005. Täärhib čielgiittâs palvâlemmáávsuin kávnoo täst: Jurgâlempalvâlusah.

– Kielâtoimâttâh jurgâl válduášálávt äššikiirjijd, iätá kielâtorvočällee Siiri Jomppanen. Freelance -jurgâleijeeh huolâtteh táválávt kuhebijn jurgâlusâin, tegu čaabâ- já tiätukirjálâšvuođâ teevstâin já oppâmateriaalâin, juátká Jomppanen.

Kielâtoimâttâh huolât asâttâsteevstâi jurgâlmist sämikieláid. Ennuv jurgâluvvojeh še čuákkimij äššikirjeh tegu čuákkimpovdiittâsah, äššilistoh, pevdikirjeh, muštâlusah, vuáváámeh já budjeteh. Eres äššikirjeh, moh jurgâluvvojeh, láá jieškote-uv virgeomâhái luámáttuvah já olgosadalduvah, almottâsah, kulluuttâsah já tiäđáttâsah. Lasseen jurgâluvvojeh virgeomâhâšmiärádâsah, lopeääših, tegu pirâsteknisiih äššikirjeh sehe tieđettemčáluseh, koolbah, viärmádâhsiijđoh já oskoldâhliih teevstah, tegu rukoseh.

Kielâtoimâttâh koordinist jurgâlemtooimâ já tagarijn tábáhtusâin, main kielitoimâttuv jurgâlemtile pokkâšuvá, stivrejuvvoo tiilájeijee väldiđ ohtâvuođâ freelance-jurgâleijeid. Kielâtoimâttâh tuálá luvâttâllâm tain sämikielâ jurgâleijein já tuulhâin, kiäh láá adelâm love ohtâvuođâtiäđuidis almostmitmân. Sii ohvuođâtiäđuh kávnojeh meiddei Sämitige päikkisiijđoin čujottâsâst www.samediggi.fi – Dokumeentah – Jurgâleijeeh já tuulhah.

Uánihávt sämikielâ toimâttuvâst

Sämitige sämikielâ toimâttâh olášit säämi kielâlaavâ já -asâttâs miäldásijd pargoid. Kielâtoimâttâh huolât laavâst uáivildum jurgâlusâi tooimâtmist jieškote-uv virgeomâháid já lájádâssáid, iššeed taid sämikielâ táiđusij tuulhâi hahâmist sehe eres säämi kielâlaavâst uáivildum pargoin. Kielâtoimâttâh vuáđudui ive 1992, ko säämi kielâlaahâ šoodâi vuáimán. Ton kyehti vuossâmuu kielâjurgâleijee algâttáin pargoos ive 1992.

Lasetiäđuh: kielâtorvočällee Siiri Jomppanen, puh 010 839 3111, ovdânommâ.suhânommâ@samediggi.fi