Lasse Lehtola (2011) Mun lam tággáár 17-ihásâš puásuialmaa algâ. Mun aasâm Solojäävrist, mii lii suullân 15 km Anarist Kittâl kuávlun já tot lii tággáár uccâ siijdâš, jis taam tagarin puáhtá nabdeđ. Muu perrui kuleh kyehti uábi, kiäh lává must puárásuboh já tastoo enni já eeči. Oopâm tääl Säämi máttááttâskuávdáást Tuáivunjaargâst puásuituálu já tääl lii monâmin nubbe ihe já ohtâ lii vala taam kiiđâ (2011) maŋa. Škoovlâ maŋa ličij juurdâ riemmâđ puásuipargoid. Puđâldâsah láá aainâs kuálástus já meecist jotteem.

Sämmilâšvuotâ lii munjin tehálâš, ko kuohtuuh muu suuvah láá puásuituálleesuuvah já tađe mield must-uv lii šoddâm puásuialmai já návt ij liččii, jis jiem liččii sämmilâš. Sämmilâšvuotâ lii tehálâš meid kielâ tááhust. Lii uáináh älkkee kulâttâllâđ ovdâmerkkân Taažâ já Ruotâ puásuialmaiguin já mane ij eres-uv ulmuiguin. Ko kielah láá siämmáásullâsiih, te iä šoodâ kielâčuolmahkin.

Mun jiem riävtui määti jurdâččiđ jieččân kuussân eres sajan tâi moonnân eres ámáttân ko puásuituálun, ko toos lii šoddâm aaibâs uccâkandii rääjist kiddâ. Puátteevuođâst tuáivuččim, et sämmilâšvuotâ puáđáččij eenâb uáinusân já kielâ kulluuččij eenâb jieškote-uv ahasijn, ko tuše puárásub ulmuin. Aainâs aanaar- já nuorttâsämikielâ oppâm kolgâččij finniđ eenâb škovláid já jyehilágán oppâmaterialân eenâb ruuđâ. Aanaarsämikielâlijd máttáátteijeid kolgâččij meiddei eenâb finniđ škovliittâsân. Puátteevuođâst ááigum sárnuđ jieš-uv aanaarsämikielâ puohâi ulmuiguin kiäi tiäđám mättiđ aanaarsämikielâ, amas alnaangin huánániččii kielâ mättim.