"Kielâ iäláskitmân sihtejeijee tooimâin kalga anneeđ mielâst, et sämmilij vuáđulavâlâš vuoigâdvuotâ jieijâs kielân já kulttuurân kuáská ubâ eennâm. Eromâš huámášume kalga kiddiđ toos, et puohâin sämipárnáin lii puigâ máhđulâšvuotâ oppâđ jieijâs kielâ já kulttuur ubâ väldikoddeest." Riehtiminister Anna-Maja Henriksson tiäduttij jieijâs sahâvuárust sämikielâ já maorikielâ iäláskittemseminaarist 13.09. táárbu läjidiđ pissoo toimâmmaali sämikielâi iäláskitmân.

Sämikielâ iäláskitmist láá finnim šiev vuáttámušâid ovdâmerkkân párnái kielâpiervâlijn já eres kielân lohtâseijee haavâin. Minister mainâšij savâstis anarâškielâ iäláskittem miänástusmainâs, maid kielâiäláskittemseminaarist oovdânpuovtij Marja-Liisa Olthuis.

- Sämikielâ iäláskittemohjelm toimâiguin, moh tääl láá joođoost, kalga juksâđ tááláást meritiätulub já nanosub syeje puohâi kuulmâ Suomâst sarnum sämikielâ uásild, minister páhudij. - Sämikielâ iäláskittemohjelm tooimâi olášuttem lii kirjejum haldâttâsohjelmân, já toimáid kalga-uv riemmâđ ohjelm tuhhiittem maŋa nuuvt jotelávt ko máhđulâš.

Haldâttâshovdâ Juha Guttorm, lahâasâttâsjođetteijee Sami Manninen, sämitige stiivrâ jeessân Petra Magga-Vars, saavâjođetteijee Klemetti Näkkäläjärvi, riehtiminister Anna-Maja Henriksson sehe stiivrâ jesâneh Anu Avaskari já Asko Länsman Helsigist 13.9.2011.

Luuvâ riehtiminister Anna-Maja Henrikssonin saavâ sämitige ornim sämikielâ já maorikielâ iäláskittemseminaarist Helsigist 13.09.2011 ollásávt täst.