Sämikielâlâš muusik škáájá já suopânjeh njurgoh ko puoh aaigij stuárráámus Säminuorâi taaidâtábáhtus vuálgá joton Anarist koskoho 28.3. Tábáhtus álgá njuárustem- já njuárustemviestâkištoin Aanaar čuoigâmstadionist tme 13.30. Ehidist čokkânep taaidâtábáhtus lekkâmáid, uđđâ säminuorâi muusikjuávhu Irdon konserttân já palhâšumij jyehimtilálâšvuotân Sajosân tme 18. Uárnejeijeeh vyerdih Anarân pyereest-uv paijeel 400 uásálisted. 29.03. tme 9.55-17: http://yle.fi/livestream/saamevideo.asx .

Säminuorâi taaidâtábáhtusah láá uárnejum 1970-lovo rääjist já tábáhtus lii vuáháduttâm sajattuvâst uássin sämikuávlu škoovlâi pargo-ohjelm já sämitige tooimâ. Tábáhtus uárnejuvvoo vuáruiivij sämikuávlu kieldâin oovtâstpargoost páiháláin škovláin já páihálij sämiservijguin. Taan ive orniimân uásálisteh sämitige lasseen Aanaar škovlâ, Säämi máttááttâskuávdáš já páihálâš sämiservi Anára Sámi searvi.

Koskoho nuorah kištodeh njuárustmist já njuárustemviestâčuoigâmist kuulmâ jieškote-uv ahasáid uáivildum rááiđust. Njuárustem- já njuárustemviestâkišto uárnejeh oovtâstpargoost Säämi máttááttâskuávdáá luándu- já mecciuápislinjáá uáppeeh sehe Inarin yritys já Anára Sámi searvi aktiiveh. Kišto jođetteijen tuáimá Aslak Paltto.

Tábáhtus váldupeivi lii tuorâstâh, kuás uđđâ Säämi kulttuurkuávdáš Sajos tekniik já stuorrâ auditorio láá vuossâmuu keerdi oles kiävtust. Sali tiävá Njuárgámist, Ucjuuvâst, Taažâ Sirmáást, Kärigâsnjaargâst, Čevetjäävrist, Hettaast, Käresavonist, Ruávinjaargâst, Suáđigilist, Vuáčust, Avelist, Tiärmáást já Anarist tábáhtusan uásálistee nuorâin huolâtteijeinis já máttáátteijeinis. Tábáhtus láá valmâštâllâm mánuppoojijd škoovlâin já puđâldemjuávhuin. Tábáhtus hirmâd stuorrâ uásálistei meeri čáittá tom, et sämikielâlâš muusikpuuđâldmeh láá pivnuuh nuorâi koskâvuođâst.

Tuorâstuv muusikkejâlmâsân láá almottâttâm ohtsis 20 muusik- já lávdástelleejuávkkud jyehi kuávlust sämikuávlu já Ruávinjaargâ kaavpugist. Tuámáreh väljejh uáslistei koskâvuođâst säminuorâi ovdâsteijeid väldikodálâš Nuorâ Kulttuur Sounds -tábáhtusân, mii uárnejuvvoo vyesimáánust Tuurkust. Kištorááiđui kulmâ pyeremus palhâšuvvojeh stipendijguin. Tuámárijn nuorttâsämikielâ já rock-muusik oovdâst Tiina Sanila-Aikio, aanaarsämikielâ já maaŋgâid muusikšlaajâid Heikki Nikula, tavesämikielâ rap-musijkkár Áilu Valle já ärbivuáválii juoigâm miäštár Inga-Máret Gaup-Juuso.

Tábáhtus tekniikâst västideh sämitige palvâlemohtâduv tekniikalmaah Joonas Saari já Janne Lappalainen, säämi máttááttâskuávdáá Erkki Feodoroff já Tuupa Records Heikki Isokoski. Tábáhtustekniik orniimân uásálist meid Yle Sámi radio. Sajos Dolla-auditorio addel tábáhtusân fiijnâ raamijd, ko kiävtust lii teatter- já konserttáálu jienâ- já čuovâtekniik lasattâsâidiskuin.

Sämitigge lii ornim linjâšautosáátuid, puurâdmijd já ijjâsoojijd puohháid Avveel Tiärmáást olgoláá puáttee uásálisteid. Tábáhtus graafisii kejâstuv (plaakaat, uásálistemtuođâštusah, logo já tábáhtus postâkorttâ) lii vuávám Tanja Sanila. Tábáhtus orniimân lep uážžum staatâtorjuu máttááttâs- já kulttuurministeriöst.

Tábáhtus äigitavlu kávnoo täst já muusikkišto lávdástemoornig täst.

Lasetiäđuh:

- tábáhtusčällee Heli Huovinen, 050-401 8009

- taaidâtábáhtusvästideijee Anni Näkkäläjärvi, 040-511 1821

- vs. nuorâičällee Inka Nuorgam, 050-382 5179

- škovlimčällee Ulla Aikio-Puoskari, 040-767 3101.