Mun lam Olga Egorova já lam 24 ihásâš. Šoddim já rávásmuvvim Ruošâst Murmansk kaavpugist. Ko lijjim páárnáš, te viettim ennuv ääigi ááhu já äijih lunne Loparskajast, mii lii 60 kilomeetter keččin Murmanskist. Muu ákku lii šaddaaš Luujäävrist já äijih Varzinost.

Rávásmuvvim sämikulttuur já –ärbivuovij siste. Ákkum eres lasseen tuoijui ennuv já mälistij masa ovttuu ärbivuáválijd sämimálásijd. Juuttim škoovlâ Murmanskist, mast lâim obijnân áinooh sämmiliih. Muštám, maht toollim maaŋgâid ovdâsaavâid jieččân luokkaskipáráid sämikulttuurist já sämmilijn.

Vuáđuškoovlâ maŋa vuolgim molsâuáppen Taažân Kárášjuuhân, vâi opâččim eenâb säämi já taažâ kulttuurist. Tast maŋa oppim hooteel- já mađhâšemsyergi Murmansk ollâopâttuvâst. Opâdijn porgim ennuv pargoid.

Ko aassim Kárášjuuvâst, te luvâškuottim tavesämikielâ. Tääl aasâm Kuovdâkiäinust já luuvâm tavesämikielâ lasseen sämikulttuur. Lam toimâm kyehti ive Ruošâ säminuorâi seervi “Sami Nurash” saavâjođetteijen. Lam ain-uv mieldi seervi tooimâin, mut tääl tooimâm värisaavâjođetteijen. Poorgâm ennuv Ruošâ säminuorâi seervist já suogârdâllâp távjá sämmilij puátteevuođâ. Lasseen poorgâm Ruošâ sämitiggeest. Astoäägi must lii vyehin tuoijuđ sämituojijd.

Lam pelisämmilâš, tegu iänááš uási Ruošâ sämmilijn. Tast peerusthánnáá lam ain annaam jieččân sämmilâžžân, jiemge riävtui puávtáččii jurdâččiđ jieččân eellim sämmilâšvuođâttáá. Nabdemist muu eellim ličij hiälpub, ko tääl must mana ennuv äigi já naavcah tehálij sämiašijguin, sierâlágánijn čuákkimijn já teividmijn. Liijká lijkkuum jieččân elimân eidu tääl já eidu tágárin, já tuubdâm sämmilij aašijd tehálâžžân. Lii mielâkiddiivâš já tehálâš iberdiđ, et pyehtip rievdâdiđ puátteevuođâ jieččân resurssij vievâst, já et pyehtip toohâđ pyereeb puátteevuođâ puáttee suhâpuolváid.

Jieččân puátteevuotâ lii ucánjáhháá epičielgâs, jiemge tieđe vala mii tobbeen lii. Kenski toos kuleh peerâ já párnááh, sehe pargo. Tast kuittâg lam vises, et šoodâm porgâđ vala talle-uv sämikulttuur pyerrin ovdâmerkkân sierâlágán projektijn. Almolávt juurdâštijn uáinám sämmilij puátteevuođâ čuovâdin, ko jis mij rooččâp ton oovdân tääl, te turvip ton siäilum.