Säämi parlamentaarlâš rääđi (Suomâ, Taažâ já Ruotâ sämitigij oovtâstpargo-orgaan) aalgât 1.1.2013 ohtsâštave-eennâmlâš sämikielâ áámmát-/reesuurskuávdáá vuáđudemproojeekt, mii nohá 30.6.2014. Proojeekt válduruttâdeijee lii EU Interreg IV A Nord Sápmi já pargo vuáválâš olášuttem várás Suomâ sämitigge ocá

1 meriáigásâš anarâškielâ kielâpargee

1 meriáigásâš nuorttâsämikielâ kielâpargee ja

1 meriáigásâš tavesämikielâ kielâpargee

ááigán 1.1.2013 – 31.5.2014.

Kielâpargee pargoid kuleh kielâtipšom, kielâovdedem, terminologia¬pargo, normâdem, sehe tieđettem- já ravvimpargo. Kielâpargei puáhtá meridiđ eres-uv tooimâid, moh kuleh ohtsâštave-eennâmlâš sämikielâ áámmát-/reesuurskuávdáá vuáđudemprojektân. Asâttâsvuáđustâslâš tohálâšvuođâvátámâššân lii pargo vaattâm škovlim já lasseen váttoo sämikielâ táiđu.

Projektân occoo vuosâsajasávt taggaar olmooš, kiäst sämikielâ lii eenikielân tâi västideijee kielâtáiđu. Tuáivup occest hiäivulâš sämikielâ škovlim (ollâškovlâ/ollâopâttâh), hárjánem västideijee pargoost já sämiohtsâškode já -kielâi tubdâm. Lasseen tuáivup áámmátlâš mättim, oovtâstpargo¬naavcâ, sämikielâ kirjálâš tááiđu sehe naavcâ jiečânâs já ulmemiäldásâš porgâmân.

Ohtsâštave-eennâmlâš sämikielâ áámmát-/reesuurskuávdáá pargokielah láá sämikielâ sehe suomâkielâ já ruotâ/tárukielâ. Kuávdáá pargon lii oovtâst sämitiggijn ohtsâštave-eennâmlâš kielâoovtâstpargo nanodem já ovdedem, sämikielâ nanodem já ovdedem nuuvt, et jieškote-uv kielâjuávhu ohtâgâslâš táárbuh, hástuseh já naavcah váldojeh vuotân, sehe sämikielâ virkosmittem já turvim puátteevuođâst.

Kielâpargee lii palvâluskoskâvuođâst Suomâ sämitiigán já pälkki miärášuvá Suomâ sämitige pálkkááttemvuáháduv vátávâšvuodâtaasij V/II – IV/IV mield (vuáđupälkki 2 051,23 – 2 391,60 eurod/mp). Vuáđupäälhi lasseen máksojeh 24 % sämikuávlu lase já pargohárjánem mield miärášuvvee hárjánemlaseh. Toimâsaje lii sämitige monnii toimâsaajeest tâi sopâmuš mield eres saajeest.

Ucâmušâid lahtosijdiskuin kalga toimâttiđ Suomâ sämitige čäällimkoodán 10.12.2012 tme 16.00 räi čujottâssáin: Sajos, 99870 Aanaar. Lasetiäđuid pargoost addel vs. kielâtorvočällee Tarja Porsanger puh. 050 343 1299. Sämitige tooimân puáhtá uápásmuđ nettičujottâsâst www.samediggi.fi. Anarist 22.11.2012 Sämitigge