Ákku áásá Pakšvuonâ riddoost, já Ánná iälá távjá tobbeen. Ááhu muštâlusâi já Ááná já Saammâl savastâlmij pehti puáhtá máttááttâllâđ mielâkiddiivávt aanaar sämikielâ. Kirje mainâsij paaldâst siämmáá lehâstuvâst kavnojeh puoh uđđâ säänih já tai sujâttemhämih. Nuuvtpâ uáppee ij taarbâš usâškyettiđ saanijd nube sijđoin, veikkâ tieđust-uv kirje loopâst kavnojeh-uv puoh pitái säänih alfabeetlâš ornigist. Maŋeluppoost ive 2013 ääigi almostuvá taan kiirján lahtâseijee hárjuttâskirje. Hárjuttâsâi pehti uáppee nanosmit já kiärdud oppum aašijd. Luuhâmpitái loopâst lii ain pitá fáádán heivejeijee laavlâ, mon ulme lii sehe movtijdiđ uáppeid já išediđ mušteđ saanijd pyerebeht.

Kirje lii čáállám Teija Linnanmäki já kuuvijd lii sárgum Riitta Ahonen. Sämitigge lii kuástidâm kirje já tom finnee uástiđ Sajosist Sámi Duodji -käävpist tâi Sämitige škovlim-já oppâmateriaaltuáimáttuvâst info(at)samediggi.fi. Kirje puáhtá uástiđ meiddei Sámi Duodji nettikäävpist. Lasetiäđuid finniih täst.