Säminuorâi taaiđâtábáhtus oláttij oppeet uárnejeijeid valjaas já movtijdâm uásálisteiguin. Heta škovlâkuávdáá lihâdemhallâ lâi aaibâs tievâ jyehi áimusundeest puáttâm nuorâin, stivrejeijein já máttáátteijein. Taaiđâtábáhtusâid láá uárnejum 1970-lovo algâiivij rääjist já tain láá šoddâm säminuoráid tergâdis čááitussaje sehe taaiđâpuđâldâsâi ete sämikielâ uáinust. Tábáhtus lii faallâm vuossâmuu aalmug maaŋgáid tááláá tobdosáid sämitaaidâráid já movtijdittâm nuorâid muusikpuđâldâsáid, teatterolgospyehtimân, taansân, kovetaiđui já čälimân. Taaiđâtábáhtus lii áinoo ihásâš sämikielâlâš nuorâitábáhtus Suomâst.

Kooveest teatterkišto tuámáreh Erkki Hetta, Issát Sámmol Hetta já Pauliina Feodoroff addelmin macâttâs já stivrim Avveel Bohccostallit -juávkun.

Hettaast koskoho já tuorâstuv 13.-14.3. toollum taaiđâtábáhtus válduteeman lâi teatter, mii nuávdit välkikodálâš Nuorâ Kulttuur- tábáhtus njuolgâdusâid. Sämitábáhtusâst lii lasseen ihásávt eromâš sämiteema. Taan ive tot lohtui Nils-Aslak Valkeapää (Áillohaš) šoddâm 70-ivváášmerkkâihán. Nuorâ taaidâreh uásálistii Áillohaš jiegâst uárnejum kovetaaiđâkiišton ohtsis 165 taaiđâráhtusáin já tiivtâčäällimkiišton ohtsis 46 tave- já aanaarsämikielâlâš tivtáin.

Kooveest tanssâteatterjuávkku Spektrolihtat Kärigâsnjaargâst

Spektrolihtat –juávkku čaittij Váimmustan lea dánsun (Váimustân lii tanssâ)-nommâsâš virkkuus tanssâteatterčájáttâs, mon juávkku jieš lâi suunnâttâllâm já stivrim oovtâst Merja Pieskijn. Juávhust tánssájii Alisa Pieski, Mira Pohjanrinne, Katja Haarla, Birit Haarla, Pinja Pieski já Biret-Inga Pieski.

Avveel vyelitääsi sämikielâlij luokai máttáátteijei Bigga-Helena Magga já Maarit Niittyvuopio stivrim Bohccostallit-juávhu čájáttâs nommâ lâi Čuoikkaid konsearta (Čuoškâi konsert). Juávhust lávdástii Ida Grønmo, Sunna Vihervirta, Anna Tervahauta, Fasku-Oskal Magga, Vilho-Simon Mäkinen, Jan-Kristian Magga, Ellenoora Haataja, Sandra Salminen já Lassi-Olavi Mäkinen.

Spektrolihtat- já Bohccostallit juávhuh vyelgih ovdâstiđ säminuorâid väldikodálâš Nuorâ Kulttuur tábáhtusân kullee Teatris- festivaalân Helsigân vyesimáánust.

Teatterkištoost palhâšui lasseen stipendáin Ucjuvnjäälmi škoovlâ 0-3-luokkalij Eallu lea dál gárddis (Iälu lii tääl käärdist) –nommâsâš teatterčájáttâs, mon lâi stivrim Siv Carita Holm. Nubbe stipendáin palhâšum Silbasuonat –nommâsâš juávkku ovdâstij páihálii Heta škoovlâ. Giđa ijat čuovgadat (Kiiđâ iijah nuuvt čuávgádâheh)-nommâsâš čájáttâs lâi stivrim Iŋgá-Máret Gaup-Juuso.

Kovetaaiđâkištoost palhâšui ohtsis 12 nuorâ taidârid, main vittâ finnejii vala eromâšmainâšume. Stiipeend já eromâšmainâšume finnejii Olavi Hetta Vuáčust, Aino-Marja Lampela Tiärmášist, Emil Eliasson Kilbisjäävrist, Elen Ánne Juuso Käresavonist já Elle-Maari Kokkonen Anarist. Stipendijguin palhâšui Elle Raudasoja Ucjuuvâst, Pinja já Alisa Pieski Kärigâsnjaargâst, Jasmin Nuorgam Avelist, Sara Keränen Avelist, Rosamaria Mattila Käresavonist já Anette Kosonen Vuáčust.

Kooveest Kokkos Elle-Maari kovetaaiđâkiišton uásálistum taaiđârááhtus, mii palhâšui ohtân pyeremusâin.

Sämitigge ornij Säminuorâi taaiđâtábáhtus oovtâst Heta škovláin já Johtti Sápmelažžat-servijn. Čuávuváá tábáhtus teeman lii tanssâ já tábáhtus ornimvuárust Suáđigil.