Spektrolihtat –juávkku čaittij Váimmustan lea dánsun (Váimustân lii tanssâ)-nommâsâš virkkuus tanssâteatterčájáttâs, mon juávkku jieš lâi suunnâttâllâm já stivrim oovtâst Merja Pieskijn. Juávhust tánssájii Alisa Pieski, Mira Pohjanrinne, Katja Haarla, Birit Haarla, Pinja Pieski já Biret-Inga Pieski.

Avveel vyelitääsi sämikielâlij luokai máttáátteijei Bigga-Helena Magga já Maarit Niittyvuopio stivrim Bohccostallit-juávhu čájáttâs nommâ lâi Čuoikkaid konsearta (Čuoškâi konsert). Juávhust lávdástii Ida Grønmo, Sunna Vihervirta, Anna Tervahauta, Fasku-Oskal Magga, Vilho-Simon Mäkinen, Jan-Kristian Magga, Ellenoora Haataja, Sandra Salminen já Lassi-Olavi Mäkinen.

Helsigist aalmuglâsteatterist já uđđâ muusiktáálust 24.-26.5. uárnejum Teatris-tábáhtus lii uási väldikodálâš Nuorâ Kulttuur (Nuori kulttuuri) –tábáhtus, mon teemah molsâšudeh ihásávt. Puáttee ive teema lii tanssâ já toos kullee tábáhtus nommâ lii Moves. Säminuorâi taaiđâtábáhtus kulá uássin Nuorâ Kulttuur-tábáhtusâi rááiđun já tobbeen väljejuvvojeh ihásávt säminuorâi ovdâsteijeeh väldikodálâš tábáhtussáid.

Teatris-tábáhtusâst juáhhojii stipendih já kunneekirjeh ohtsiš 38 juávkun já tábáhtusân uásálistii paijeel 1 000 nuorâd pirrâ Suomâ.

Keejâ Yle Säämi uđđâs já kuuvijd taan liiŋkâst!

Keejâ Nuorâi väldikodálii Teatris-tábáhtus uuđâssiijđo tast!