Sahâalmaa delegaatiost lijjii fáárust vuáđulahâváljukode saavâjođetteijee Johannes Koskinen, haldâttâhváljukode saavâjođetteijee Pirkko Mattila, staatâvarijváljukode saavâjođetteijee Kimmo Sasi, eennâm- já meccituáluváljukode saavâjođetteijee Jari Leppä sehe ekonomiaváljukode saavâjođetteijee Mauri Pekkarinen sehe ovdâskode uáivičällee Seppo Tiitinen já tiätu- já viestâdemčällee Marjo Timonen. Sahâalmaa juávhu mätkiorniimijn västidij Laapi litto já mieldi lijjii meid Laapi lito saavâjođetteijee, aalmugovdâsteijee Markus Lohi, eennâmkoddehovdâ Mika Riipi já ohtâvuotâhovdâ Maiju Hyry.

Sahâalmai Eero Heinäluoma adelij ovdâskode skeeŋkâ sämitiigán. Saavâjođetteijee Näkkäläjärvi kiijtij skeeŋkâst já lopedij ete tavlu piäijoo árvusajan Sajosân. Kove: Johanna Alatorvinen 

 

 Sahâalmai lâi halijdâm kuullâđ sämitige uáinuid eromâšávt ILO 169-sopâmuš ratifisistmist. Saavâjođetteijee Näkkäläjärvi kieđâvušâi saavâstis vijđáht Suomâ aalmugijkoskâsii kuođâid, ILO 169-sopâmuš ratifisistem, Meccihaldâttâslaavâ uđâsmittem sehe sämitiggelaavâ uđâsmittem valmâštâllee pargojuávhu smiettâmuš.  Näkkäläjärvi tiäduttij saavâstis ete ILO sopâmuš ratifisistem valmâštâllâm kalga algâttiđ tállân vâi ratifisistem kiergân ovdâskode kieđâvušmân.  Suomâst láá ain šiev máhđulâšvuođah ratifisistiđ sopâmuš. ” ratifisistem váátá poolitlii táátu já šiev ohtsâšpargo Suomâ staatâ já sämitige kooskâst. Sopâmuš ratifisistem pirrâ láá tušes paloh ige ton ratifisistem iästáččij mahten eres aalmug eellim já iäláttâsâi hárjuttâllâm sämikuávlust” Näkkäläjärvi tiäduttij. Sämitigge mainâstij ete sämitiggelaavâ uđâsmittem valmâštâllee pargojuávhu iävtuttâsah láá jo tääl ruossâlâsvuođâ čuávduseh ige taid koolgâ hiäjusmittiđ laavâ jotkâvalmâštâllâm ohtâvuođâst. Tilálâšvuođâst savâstâllui meid ruukitooimâst já ton vaikuttâsâin sämikulttuurân sehe arktâlii kuávlu hástusijn. 

 

Kooveest čižetroobdâst uálgisroobdân Johannes Koskinen, Marjo Timonen,  Seppo Tiitinen, Eero Heinäluoma, Jari Leppä, Pirkko Mattila, Kimmo Sasi, Markus Lohi, Mauri Pekkarinen, Klemetti Näkkäläjärvi, Tiina Sanila-Aikio já Heikki Paltto. Kove: Johanna Alatorvinen. 

” Sämitige peeleest lam ilolâš, ete sahâalmai já váljukudij saavâjođetteijeeh láá halijdâm uápásmuđ sämitige tooimân já äigikyevdilis sämiaššijd.  Ovdâskodde lii sämitige tehálâš ohtsâšpargokyeimi já lii tehálâš, ete peessâp lonottiđ jurduid já mainâstiđ sämitige tooimâst já uulmijn” saavâjođetteijee Näkkäläjärvi mainâstij. Sämitige I värisaavâjođetteijee Tiina Sanila-Aikio já II värisaavâjođetteijee Heikki Paltto mainâstáin eromâšávt säämi puásuituálu tiileest já roolist sämikulttuurist. Tiina Sanila-Aikio mainâstij meid nuorttâlij sierânâskoččâmušâin. 

 

Ovdâskode sahâalmai sehe sämitige saavâjođetteijee Klemetti Näkkäläjärvi já värisaavâjođetteijeeh Tiina Sanila-Aikio já Heikki Paltto. Kove: Johanna Alatorvinen. 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

” Tilálâšvuotâ lâi uáli liegâs já mist lâi eromâš savâstâllâm sahâalmain já váljukudij saavâjođetteijeiguin. Tilálâšvuotâ lâi kuohtui pelij peeleest luhostum já leim siämmáá mielâ tast, ete sämiaššijn lii máhđulâš peessâđ ovdâskulij positiivlâš já šiev vuoiŋâst. Áinoo vädisvuotâ lâi tuše ääigi nuuhâm. Mun tuáivum-uv, ete pyehtip juátkiđ savâstâllâm já jurdui lonottem val maŋeláá”, Näkkäläjärvi mainâstij. 

Sämitige muštottemčáálus sahâalmai

Klemetti Näkkäläjärvi saahâ

Lasetiäđuh:

saavâjođetteijee Klemetti Näkkäläjärvi