Oles uáppeemeeri lii lasanâm oovdeb luuhâmivveest ohtsis 59. Stuárráámus lasanem lii lamaš sämikielâ amnâsmáttááttâsâst (+70). Sämikielâlâš máttááttâs uáppei meeri lii ton tááhust kiäppánâm 11 uápped. Anarâškielâlâš máttááttâs uáppeemeeri lii oovdeb ive tääsist (15), nuorttâlâškielâlâš máttááttâs lii muttum amnâsmáttááttâssân (-5) já tavesämikielâlii máttááttâs uáppeemeeri lii kiäppánâm kuuđáin. Uáppee-ennustâsah čäittih kuittâg, ete sämikielâlâš máttááttâs lassaan puáttee iivijn ko sämikielâlâš arâšoddâdem naanood sajâttuv. Sämikielâlâš arâšoddâdem uárnejuvvoo sämikielâlijn peivikiäjuin teikâ peivikiäččujuávhuin já sämikielâid iäláskittee kielâpiervâlijn. Kielâpiervâltoimâ lii vijđánmin sämikuávlust eres kuávluin.

 

Väldiuási sämimáttááttâsâst adeleh sämikuávlu kieldâin, moh finnejeh taan máttááttâsân sierânâs vittádum staatâtorjuu. Sämikuávlu kieldâin sämikielâlâš já sämikielâ máttááttâsâst láá ohtsis 549 uápped. Lasanem lii lamaš othsis 33 uápped oovdeb škovlâihán verdiddijn.

 

Aanaar kieldâ škoovlâin sämikielâ já sämikielâlâš máttááttâsâst láá ohtsis 262 uápped, mast lasanem oovdeb ihán 22. Jieijâs uáppei lasseen Aanaar kieldâ máttáátteijeeh adeleh káidusmáttááttâs ohtsis käävci luvâttâhuáppei. Aanaar kieldâ sämimáttááttâs uáppeemeeri lii lasanâm täsivávt ive 2007 rääjist.

 

Ucjuv kieldâ škoovlâin sämikielâ já sämikielâlâš máttááttâs adeleh ohtsis 124 uáppei, mast lasanem oovdeb ihán 16. Sämikielâlâš máttááttâs koskâvuođâlâs uási lii stuárráámus Ucjuuvâst. Sämikielâlii máttááttâs uási lii šoddâm iivij mield čielgâsávt. Taan luuhâmive meid sämikielâ amnâsmáttááttâs uáppei meeri lii lasanâm 18.

 

Iänuduv kieldâ škoovlâin sämikielâ já sämikielâlâš máttááttâs adeleh ohtsis 61 uáppei. Uáppeemeeri lii kiäppánâm oovdeb škovlâivveest 15 uáppein. Meid Iänuduvvâst já Ucjuuvâst adeleh káidusmáttááttâs eres kuávluid enâmist.

 

Suáđigil kieldâ škoovlâin uáivitiäddu lii sämikielâ amnâsmáttááttâsâst, mon finnejeh ohtsis 99 uápped. Uáppeemeeri lii lasanâm oovdeb škovlâivveest 10. Sämikielâlâš vuáđumáttááttâs adeleh kuulmâ uáppei. Ennusteh, ete sämikielâlii máttááttâs uáppeemeeri lassaan puáttee iivij ääigi.

 

Sämikuávlu kieldâi ulguubeln uáppeemeeri lii stuárráámus Oulu kuávlust, kost kielâ amnâsmáttááttâs adeleh ohtsis 15 vuáđumáttááttâs uáppei já 13 luvâttuv uáppei. Ruávinjaargâ kaavpug kuávlust sämikielâ máttááttâs finnejeh ohtsis 12 vuáđumáttááttâs uápped já kuttâ luvâttuv uáppee. Helsig kuávlust sämikielâ máttááttâsâst láá ohtsis 10 vuáđumáttááttâs uápped. 

 

Ubâ enâmist sämikielâ teikâ sämikielâlâš vuáđumáttááttâs finnejeh ohstis 542 uápped. Luvâttuvâi oohtânrekinistum sämikielâ uáppeemeeri 71. 

 

Sämitigge čuávvu já raportist sämimáttááttâs ubâlâšvuođâst Suomâst. Sämimáttááttâs uáppeelovottuvah láá täst.