Stivrâ tuhhiittij oovdânpyehtimnáál almosčuákkimân sämitige toimâmuštâlus ivveest 2013. Toimâmuštâlusâst čuávvuh sämitige vaaljâpaje toimâohjelm já budjetive uulmij olášume. Toimâmuštâlus tuhhiittuvvoo sämitige eidusii čuákkimist, mii tuálloo kesimáánu 9. peeivi, oovtâst ive 2013 ruttâtuálulopâttemáin.

 

Stivrâ tuhhiittij kuhháá valmâštâllum sämitige pargovievâ uápásmemohjelm. Uápásmemohjelm lii uáivildum uđđâ pargeid sehe meid virgehaldâšeijeid raavân já muštottâssân. Uápásmemohjelm lii valmâštâllâm pargovievâ nomâttem pargojuávkku.

 

Stivrâ čonâdâtâi väridiđ toimâttâhtiilijd oovtâ pargee várás Nuorttâlâškulttuurkuávdáást, mii vuáđuduvvoo Čevetjáávrán. Nuorttâlâškulttuurkuávdáá ovdedem lii ohtâ sämitige taan vaaljâpaje njunošuulmijn.

 

Sämitige stivrâ kieđâvušâi falâlduv raavâdviäsu Galla laiguutmist já ravvij haldâttâhhoovdâ ráđádâllâđ falâlduv tahheiguin láigusopâmuš tärhibijn iävtuin. Jis láigusopâmuš šadda, sämitigge tieđeet ääšist sierâ.

 

Stivrâ nomâttij säämi parlamentaarlii rääđi (SPR) nuorâilävdikoodán nuorâirääđi nomâttem iävtukkâsâid Niila Rahko (värijesânin Aslak Holmberg) já Anne-Maret Labba (värijesânin Elli-Marja Hetta). Nuorâilävdikode pargon lii toimâđ säminuorâi jiennân já ovdediđ säminuorâi sajattuv SPR:st.

 

Stivrâ nomâttij tave-eennâmlii Säämi Kielâkäldee kielâjuáhusij värijesânijd. Tavesämikielâ kielâjuáhusân nomâttij värijesânin: Ulla-Maarit Magga já Ailu Valle; anarâškielâ kielâjuáhusân: Tanja Kyrö, Hannu Kangasniemi já Mervi Skopets sehe nuorttâlâškielâ kielâjuáhusân: Miika Lehtinen, Hilkka Fofonoff, Raija Lehtola já Zoja Nosova. Kielâkäldee lii Suomâ, Taažâ já Ruotâ sämitigij ohtsâšproojeekt. Säämi Kielâkäldei lii tárguttâs nuurrâđ säämi kielâáámmátlijd palvâlusâid. Tárguttâssân lii, ete kielâkuávdáást lii alemuu ovdâsvástádâs säämi kielâoovtâstpargoost, kielâáámmátlii pargoost já kielâkevtteid čujottum sämikielâlijn kielâpalvâlusâin.

 

Stivrâ nomâttij ovdâsteijen eennâmkode oovtâstpargojuávkun (MYR) Anna Morottaja já suu värijesânin Heikki Paltto. MYR:n láá asâttum lahâaasâtliih pargoh já tot čokkân Laapi lito ohtâvuođâst. MYR olášut ráhtusruttârájuohjelmijd já heiviit oohtân kuávluovdedem.  

 

Stivrâ nomâttij sämikuávlu enâdâhkuávlui árvuštâllâmjuávkun pirâsčällee já suu värijesânin lahâčällee. Laapi iäláttâs-, jotolâh- já pirâskuávdáš piäjá joton sämikuávlust mávsulij enâdâhkuávlui já enâdâhuáinálduvâi peivideminventistem.

 

Stivrâ tuhhiittij alguu pajeuáppeetuđhoslävdikoodán já máttááttâs- já kulttuurministeriön. Algust oovdânpyehtih sämikielâ finnim ubâ pajeuáppeetutkos kiellân sehe sämikielâ sajattuv pyeredem eenikielâ já vieres kielâ iskosijn.

 

Stivrâ tuhhiittij ciälkkámuš hammiittâsâst Ucjuv uásikuávlu uásialmoskaavast sehe markkân sajattâhkaava hammiittâsâst. Sämitiggeest ij lamaš huámášuttem markkân kaavan. Ucjuv uásikuávlu uásialmoskaavast sämitigge vaatâi toollâđ sämitiggelaavâ miäldásijd ráđádâlmijd sehe vuástálistij Suoppâjäävri, Mierâšjäävri já Puáđupove –kuávloid vuávájum huksimsoojij soijim kaavaiävtuttâs mield. Huksimsoojijd kolgâččii soijiđ uđđâsist nuuvt, ete toh iä häittiđ puásuituálu hárjuttemiävtuid. Sämitigge meid vaatâi ete kaavaamist väldih huámmášumân Meccihaldâttâslaavâ 4 § kenigâsvuođâid ađai luándu mááŋgânálásâšvuođâ, sämikulttuur já puásuituálu turvim.

 

Stivrâ toovâi oovdânpyehtim AIL:n sämikielâlij vajoidittemkuursâi orniimân ive 2015. Stivrâ oovdânpuovtij orniđ Aslak-kuursâid sämmilij ärbivuáválijn iäláttâsâin já irâtteijen pargeid sehe toimâttâh-, tipšo-, šoddâdem- já máttááttâssyergi pargeid, Tules-kuursâid pargoelimist já iäláttuvvâst leijee ulmuid, kuursâid omâhâštipšoid já pargoost vaibâm ulmuid sehe Tyk-valmim.​