Festivaal algâaalmugkyessi Veronika Usholik Gubernator juávhoinis puátá Anarân Siberiast, Tsukotka njaargâst, mon lasseen tábáhtusâst peessâp navdâšiđ syemmilâš-senegalâš Sila Fato- juávhu movtijdittee musikkist. Lasseen ohjelmist láá sämimuusik konserteh, párnái ohjelm, ärbivuáválâš juoigâm, anarâš livđe, nuorttâlâš leu´dd, nuorttâlâškatrill, sämimuusik klubiehideh sehe ubâ eehid pištee sämityeje markkâneh.

 

Tábáhtus álgá vástuppeeivi 15.8 Säämi kulttuurkuávdáá Sajosist jo ärbivuáválâžžân šoddâm párnái- já nuorâipeivijn. Peeivi ääigi láá sämiuáppeid uáivildum muusikpargopáájáh sehe puohháid áávus já nuuvtá Ijahis ija násttážat-konsert. Párnáikonsertist kuullâp párnái jieijâs lávdástemij lasseen algâaalmugkuosij muusik. Vástuppeeivi klubieehid lii hooteel Kollehovist, kost musikkist västidává DJ Oula sehe anarâš ráppájeijee Amoc.

 

Lávurduv festivaal ohjelm álgá Saijoos auditoriost Fossekallen- kuoro konsertáin. Fossekallen acappella kuoro puátá Neidenist já tast láá aldá kulmâlov moovtâ syemmilâš, taazâlâš já ryeššilâš kuorolavlod. Ijâttes iijâst kuoro oovdânpuáhtá el. nuorttâlâš leu´dd jiešlágán vuovvijn.

 

Kuorokonsert maŋa tábáhtus juátkoo Saijoos šiljoost olgofestivaalin, kost Mari Boine lasseen lávdásteh el. kárášjuvâlâš Felgen Orkester, mii čuojât já juáigá tavesämikielâlâš poprock. Eehid maaŋgâpiälásumos konsertist västid Tuupa Houseband maaŋgáin artistijguin. Tuupa konsert artiseh láá Ailu Valle, Amoc, Tiina Sanila-Aikio, Ulla Pirttijärvi Länsman, SomBy sehe Niillas Holmberg. Ärbivuáválii juáigusist, livđest já leu´ddist peessâp navdâšiđ Petra Magga-Vars, Matti Morottaja, Tiina Sanila-Aikio sehe Johan Anders Baer ”Jävripiegah”- konsertist. Lasseen tábáhtusâst láávdást aanaarlâš Aila-duo, kote vuoitij ive 2014 Sámi Grand Prix-lávlumkišto anarâškielâlâš Naharij kandâ -pitáin.

 

Lávurdâh-eehid klubieehid uárnejuvvoo oppeet hooteel Kollehovist, kost musikkist västid DJ Oula. Tábáhtus lii máhđulâš čuávvuđ lávurduv uásild Säämi máttááttâskuávdáá olášuttem livestream-nettivuolgâttâs peht.

 

Ijâttes iijâ uárnejeh oovtâstpargoost Anára Sámisearvi ry, Sämitigge, Säämi máttááttâskuávdáš, Yle Sápmi, Laapi taaiđâtoimâkodde, Hooteel Kollehovi sehe Saijoos raavvâdviäsu.

 

Kovemateriaal čujottâsâst: www.ijahisidja.fi 

 

Lasetiäđuh: Sämitigge/ säämi muusikkuávdáš

  

Anu Magga Unna-Maari Pulska

Pyevtitteijee Išepyevtitteijee

anu.magga(at)samediggi.fi unna-maari.pulska(at)samediggi.fi

p. + 358 50 567 2204 p. + 358 50 439 8557