Sämitigge nanodij ive 2013 ruttâtuálulopâttem |
![]() |
![]() |
Sämitige čuákkim nanodij ive 2013 ruttâtuálulopâttem. Ruttâtuálulopâttem lâi 43 176,06 eurod.
Sämitige čuákkim lâi budjetistâm ihán 2013 71 000 euro vuálápáácu budjet. Eidusii tooimâ puátuseh lijjii 5 886 066,90 eurod já manoh -5 842 487,75 eurod. Sämitige manoin fasta (pargoviehâ- já toimâtilekoloh) lijjii 85 %.
Sämitige eidusii tooimâ puáđus lâi 55 338,13 eurod. Eidusii tooimân kuleh riehtiministeriö almos staatâtorjuu kiävttu, säämi kielâoovtâstpargo, nuorâirääđi toimâ, säminuorâi taaiđâtábáhtus já tave-eennâmlâš sämisopâmuš. Säämi kulttuurkuávdáš Saijoos palvâlemohtâdâh, mii hoittáá Saijoos palvâlemvyebdim já kulttuurkuávdáá toorjâpalvâlusâid, toovâi táápu -8 448,68 eurod.
Sämitige tilitärhisteijeeh láá tilitärhistemmuštâlusâstis pahudâm, ete sämitige ekonomia já haldâttâh láá hoittájum lavâlávt já miärádâsâi miäldásávt.
Sämitige ive 2013 toimâmuštâlusâst láá kieđâvuššâm vijđáht sämitige jieijâs tooimâ já budjetihán já vaaljâpajan asâttum uulmij olášume. Sämitigge lii uđâsmittâm toimâmuštâlus rähtimvyevi. Sämitigge adelij ive 2013 198 sierâlágán ciälkkámuš teikâ čállus. Tain 154 lijjii ciälkkámušah, 4 iävtuttâsah já 40 muštottemčálusid teikâ väidimid.
Sämitiggeest lijjii ohtsis 83 ovdâsteijed sierâ pargojuávhust. Sämitigge ráđádâlâi muštâlusive sämitiggelaavâ § 9 miäldásijd ráđádâlmijd ministeriöiguin kulmii já eres virgeomâháiguin neljii. Lasseen sämitiggeest lijjii kerdiluándusiih čanosjuávkku- já ovdâstemteivâdmeh 65 keerdi.
Nube toimâivvees Sajosist ellii s. 12 000 čuákkim- já tábáhtusäššigâssâd. Sajosist uárnejii muštâlusive ääigi 40 aalmugtábáhtusâid.
Muštâlusive sämitiggeest lijjii joođoost 7 sierâ projektijd, main sämmilij sosiaal- já tiervâsvuođâpalvâlusâi ovdedemrááhtus- haahâ nuuvâi ive 2013.
Ihán 2013 lijjii asâttâm kuttâ váldu-ulme: sämitiggelaavâ uđâsmittem, ILO 169-sopâmuš ratifisistem, tave-eennâmlâš sämisopâmuš, sämikielâi iäláskittemohjelm já biodiversiteetsopâmuš artikla 8(j) olášuttem, uáiviminister Jyrki Katais haldâttâsohjelm sämikirjiimij ovdedem sehe sämitige pargoviehâpooliitlij ohjelmij tuhhiittem. Váldu-uulmijd olášuttii válduoosijn sämitige eidusii tooimân mieđettum meriruuđáin. Váldu-uulmijn sämitige pargoviehâpoolitliih ohjelmeh láá tuhhiittum já artikla 8(j) olášuttem lii pehtilittum. Eres váldu-uulmeh iä budjetive ääigi ovdánâm suuijâi tiet, moh iä lamaš sämitiggeest kiddâ.
|