”Sämitigge lii čuuvtij ilolâš, ete piäluštâsministerist lâi asto maailmpooliitlij kriisâi kooskâst kolliđ sämikuávlu. Eromâš ilolâš lam tast, ete sun valjij kollimčuosâttâhnis muu päikkikuávlu”, sämitige saavâjođetteijee Klemetti Näkkäläjärvi muštâlij. 

Teivâdem fáddán lâi haldâttâsohjelm sämmilijd kyeskee uulmij já kenigâsvuođâi olášum. Piäluštâsminister Haglund já saavâjođetteijee Näkkäläjärvi pahudáin tuđâvâžžân, ete veikâ ovdâskoddepaje aldan loppâsis já algatileh lijjii vaigâdeh, te haldâttâsohjelm sämmilijd kyeskee ulmeh láá olášuumin tievâslávt.  ”Taat lii sämmilij tááhust uáli historjálâš, tastko ovdil lep finnim lopádâsâid, mutâ toh láá pááccám olášuuhánnáá. Haldâttâsohjelmist iä lah kuássin ovdil lamaš návt maaŋgah sämmilijd kyeskee ulmeh já oro, ete toh olášuveh tievâslávt”, saavâjođetteijee Näkkäläjärvi muštâl. 

”Haldâttâsohjelmist lijjii spiekâstâhlii äŋgiris ulmeh sämiaašij oovdedmân. RAP lii čonâdâttâm tai olášutmân jo moonnâm vaaljâkampanjastis já tiäđust-uv meid haldâttâsráđádâlmijn. Tääl ulmeh láá olášuumin puohnáál já tot čáittá, ete RAP:n puáhtá lyettiđ. Tom, maid mij lopedep, viggâp meid olášuttiđ” paahud RAP saavâjođetteijee, piäluštâsminister Carl Haglund. 

Algâaalmugij sajattuv láá nanodâm eidu tääl gloobaal tääsist algâaalmugij maailmkonferens loppâäššikirje tuhhiittem mield. Loppâäššikirje prinsiipeh láá meid maailmráávhu ovdedeijee ääših. Algâaalmugeh pyehtih kevttiđ vuoigâdvuotâ- já vižijčuávdimvuáháduvâid siärváduvâidis siste mutâ meid vijđásubbooht ohtsâškoddeest. Staatah čonâdâteh konsultistiđ já rähtiđ oovtâstpargo algâaalmugijguin sii jieijâs parlamentaarlij orgaanij peht. Oovtâstpargo ulmen lii finniđ algâaalmug rijjâtátulâš, munetiätun vuáđuduvvee tuhhiittem mii ihánis proojeekt tuhhiitmân, mii čuosât sii ärbivuáválávt asâiduttem eennâm- já čäcikuávloid teikâ eres resursáid. Meid mii aalmuglii tääsi čuávduseh sämiaašijn kuávdoo ekonomâlii epivisesvuođâ kalgeh leđe čielgâ saavah tast, ete algâaalmugij, Suomâst sämmilij, sajattuv nanodem lii meid linjáást tai gloobaal prinsiipijguin já oovded ohtsâšibárdâs (já torvolâšvuođâ) sämmilij já staatâ kooskâst. 

”Taat lii tergâdis lävkki ovdâskulij já lam uáli ilolâš tast, ete algâaalmugij sajattuv torvejeh meid aalmugijkoskâsávt. Aalmuglávt taam pargo kalgeh juátkiđ meid puáttee haldâttâspaje ääigi, paahud piäluštâsminister Haglund. 

”Oovtâstpargo suomâruátálijguin já sämmilijguin lii lamaš luándulâš já uáli tergâd kuohtuid almugáid. Lep uáli iloliih tast, ete oovtâstpargo lii lasanâm. Lii tergâd, ete aalmugliih ucceeblovoh tuárjuh nubijdis já ucceeblovoi vuoigâdvuođâid já vuoigâdvuođâ jieijâs kielân já kulttuurân. Lii pyeri juátkiđ oovtâstpargo”, piäluštâsminister Haglund já saavâjođetteijee Näkkäläjärvi pahudáin. 

Minister uápásmui kollim ohtâvuođâst meid Iänuduv luándun já pivdokulttuurân. Iänuduv puásuisämmiliih já sämitigge skeŋkkejii piäluštâsministerân vyesi, mast lâi šleđgâlâš čevepäddi. Iänuduv puásuisämmiliih láá skeŋkkim Monaco furstâ Albertân vyesi talle ko sun lii kollim Iänuduvâst ive 2012. Minister Haglund puásui kuátu siämmáá Jauristuoddâr siijdâst ko furstâ Albert puásui. Säämi máttááttâskuávdáá vs. rehtor Janne Näkkäläjärvi huolât teknisijd ornimijd nuuvt, ete piäluštâsminister puáhtá čuávvuđ poccus kuáttum päikkitäturáin.

Lasetiäđuh:  Sämitige saavâjođetteijee Klemetti Näkkäläjärvi, 0505242109

                  Ministerjuávhu sierânâsišedeijee Malin Brännkärr, 040-5347727