Iävtuttâs sämitige čuákkimij stream-vuolgâtmist lii toohâm sämitige nuorâirääđi. ”Lam ilolâš, ete säminuorah láá lamaš aktiivliih. Tääl pyehtip stream-vuolgâttâssáin juksâđ meid Aanaar ulguubeln já sämikuávlu ulguubeln ässee sämmilijd já čuákkimij čuávvum šadda älkkeebin. Stream-vuolgâttem lasseet tuáivu mield tiäđu sämitige tooimâst vijđásubboht-uv” saavâjođetteijee Klemetti Näkkäläjärvi kommentistij miärádâs.

Sämitige I värisaavâjođetteijee Tiina Sanila-Aikio oovdânpuovtij čuákkimân OA algâaalmugij maailmkonferens loppâäššikirje. Loppâäššikirje merkkejui čuákkimist tiättun. ”Loppâäššikirjeest staatah nanodeh čonâdâttâmvuođâs OA algâaalmugjulgáštuš olášutmân. Taat meerhâš tom, ete OA algâaalmugjulgáštušâst lii šoddâmin ain eenâb kenigittee äššikirje aalmugijkoskâsii politiikâst já meid riehtiopâlávt” Tiina Sanila-Aikio čiälgá. 

Sämitige čuákkim ráhtádâtâi sämitiggelaavâ vuáimánšoddâmân. Sämitiggelaavâ uđâsmittem šoodâš vuáimán ive 2014 loopâst teikâ 2015 aalgâst. Laavâ sirdumääigih pyehtih jođettiđ toos, ete vaaljâluvâttâllâm tievâsmittem njuolgimvátámâškieđâvuššâm tábáhtuvá uáli jotelis äigitavluin. Uđđâ laavâ mield njuolgimvátámâšah vaaljâluvâttâllâm tievâsmitmist tohhuuččii sämitige čuákkimân (26 §). Vaaljâluvâttâllâm já njuolgimvátámâšlattim pyehtiv vaattâđ stiivrâst já almosčuákkimist paijeelmiärásijd čuákkimijd já čuákkimij jotelis čuákánkočom. Njuolgimvátámâšâid kalgeh kieđâvuššâđ tai luándu tiet uáli jotelávt amas occei vuoigâdvuođâtorvo hiäjusmuđ. Taan tiet čuákkim meridij mutteđ sämitige pargo-oornig 56 § tienuuvt, ete tááláá 10 peeivi saajeest čuákkim äššilisto kolgâččii vuolgâttiđ tigejesânáid majemustáá 7 peivid ovdil čuákkim. Nubástus ij meddâlist tom máhđulâšvuođâ, ete čuákkimpovdiittâsâid já äššilistoid iä puávtâččii vuolgâttiđ tađe ovdil. 

Ive majemuš sämitige čuákkim tolluš juovlâmáánust. Talle äššilistoost lii el. sämitige budjet-toimâvuávám tuhhiittem ihán 2015.