Seminaar vuolgâttuvvoo stream-vuolgâttâssân čujottâsâst sogku.fi/live . Seminaar puáhtá maŋeláá čuávvuđ meid tavesämikielâlii teikâ suomâkielâlii vuárkkán. Seminaar álgá  28.11.2014 tijme 9.00 já nohá tijme 18.45.

Seminaarân uásálisteh suullân 90 kyessid Euroop rääđi sierâ orgaanijn, virgeomâhááh Suomâst, Ruotâst já Taažâst, sämipolitijkkáreh Suomâst, Taažâst, Ruotâst já Ruošâst sehe sämiseervij ovdâsteijeeh já totkeeh.

Seminaar ulmen lii lasettiđ tiäđulâšvuođâ sämmilijn, ovdediđ soováášvuođâ já maaŋgâhámásâšvuođâ sehe lasettiđ tiäđulâšvuođâ Euroop rääđist já ton orgaanijn. Seminaar lii Euroop rääđi piiloothaahâ, mast lasetteh Euroop rääđi sierâ kocceemorgaanij oovtâstpargo oovtâ teema, taan tábáhtusâst sämmilijd kyeskee aašij kieđâvušmist. Seminaar lii áinoošlajâsâš já addel virgeomâháid, kocceemorgaanáid já sämituáimeid máhđulâšvuođâid vuáruvaikuttâsân já jyehiđ šiev vuáttámušâid já vuáháduvâid olmoošvuoigâdvuođâi olášutmân.

Seminaar iiđeedpeeivi ohjelmist teeman láá Euroop rääđi sopâmušah já sopâmušâi olášuttem kocceem. Uásist kieđâvuššojeh el.  aalmuglij ucceeblovoi suojâlmân kyeskee raamialmossopâmuš já kuávlulijd teikâ ucceeblovokieláid kyeskee Eurooplii vuáđukirje olášuttem sehe Euroop raasiism já soováášmettumvuođâ vuástásii komitea (ECRI) pargo.
Iiđeedpeivi juátkoo kejâstuvváin sämmilij kielâlijd vuoigâdvuođáid já sämikielâ virtuaal- já káiđusmáttááttâsân.

Seminaar eehidpeiviohjelm álgá tijme 14.15 jurbâ peevdi savâstâlmáin säminisonij roolist muttojeijee ohtsâškoddeest. Eehidpeivi juátkoo oosijn, mii kieđâvuš säminuorâi vuoigâdvuođâid. Säminuorah Ruotâst, Taažâst já Suomâst savâstâleh säminuorâi máhđulâšvuođâin hárjuttiđ ärbivuáválii eellimtääpi, ucebij sämikielâ- já sämikulttuurjuávhui tiileest já sämikulttuur paijeentolâmist kaavpugijn sehe sämmilij seksuaalucceeblovoi vuoigâdvuođâin. Seminaar nohá jurbâ peevdi savâstâlmân sämmilijn mediast.

Seminaar ääigi kuleh ärbivuáválii já uđđâáigásii sämimuusik já seminaaraalmugist lii máhđulâšvuotâ uápásmuđ ärbivuáválii sämituáján.

Liŋkki seminaar ohjelmân

Lasetiäđuh Euroop rääđist

Ucceeblovoraamisopâmuš teemaatliih čielgiittâsah

Kuávlulijd já ucceeblovokieláid kyeskee sopâmuš

ECRI