Sämitige čuákkim tuhhiittij ive 2015 budjet. Eidusii tooimâ puáđuh láá 2,738 miljovn eurod. Budjet lii nollábudjet ađai manoh láá siämmáá ennuv ko puáđuh.  Sämitige vaaljâi budjet lii 250 000 eurod. 

Sämitige eidusii tooimâ manoin 47 % láá pargoviehâkoloh. Poolitlii tooimân já čuákkimáid láá väridum 11 % eidusii tooimâ budjetist. Láigukoloh láá 21 % budjetist. Eres koloh láá 21 %, toh aneh sistees om. haldâttâhkoloh. Sämitige eidusii tooimâ ruttâdmist 78 % puátih riehtiministeriöst, 4,8 % máttááttâs- já kulttuurministeriöst, 15 % láá riehtiministeriö láiguiše já 2,2 % láá jieijâs tooimâ puáđuh. 

Sämitigge juáhá staatâtorjuid sämikielâlij sosiaal- já tiervâsvuođâpalvâlusâi já arâšoddâdempalvâlusâi pyevtitmân sehe sämikielâlii oppâmateriaalpyevtittâsân já sämmilijd kulttuurpalvâlussáid 2,234 miljovn eurod. Sämitige sierânâsprojektij puáđuh já manoh lijjii 391 000 eurod. Saijoos palvâlemohtâduv budjet lii 1,267 miljovn eurod. 

Budjetive puáđuh já staatâtorjuuh láá miäruštâllum lemin ubâlâžžân 6,615 miljovn eurod. Sämitige budjetist puáđuh láá 9,36 % eenâb ko ive 2014 budjetist. Puáđui šoddâm čielgejeh válduášálávt sämitige vaaljah já tai sierânâsruttâdem. 

Sämitigge asâttij käävci váldu-ulmed budjetihán 2015. Váldu-ulmen lii sämitige vaaljâi ornim. Hiäđukocemân kyeskee ulmeh kieđâvušeh ILO 169-sopâmuš ratifisistem, uásálistem haldâttâsráđádâlmijd, sämikielâi iäláskittemohjelm olášuttem já tave-eennâmlii sämisopâmuš tuhhiittem. Sämitige haldâttuv já jieijâs tooimâ njunošulmen asâttii sämitige pargo-oornig uđâsmittem já pargoviehâhaldâttuv ovdedem. Sämitigge tuhhit budjetive suhâpuolvâohjelm já uárnee sämmilij siärvuslâšvuođâ tuárjoo sämikulttuur miäldásii sämmilij aalmuglâšpeeivi juhle 6.2.2015 Anarist já juhle vuolgâttuvvoo meid stream-vuolgâttâssân. 

Almosčuákkim tuhhiittij lasseen ovtâskâsčuággásijd sektorkuáhtásijd uulmijd já tai budjetijd el. hiäđukocceem, kielâlij vuoigâdvuođâi, sierânâsprojektij já Saijoos palvâlemohtâduv uásild.   

Sämitige čuákkim nomâttij sämitige nuorâirääđi värijesânin iäru pivdem Anna-Katariina Feodoroff sajan Leena Fofonoff. 

Sämitige čuákkim internetvuolgâttâs čuovvuu 179 keččed.