| Säminuorâi taaiđâtábáhtus uápisin! – čáitálduv lekkih Siijdâst aalmugpeeivi |
|
|
|
Sämimuseo Siijdâst Anarist lekkih Säminuorâi taaiđâtábáhtus uápisin! – čáitálduv sämmilij aalmugpeeivi 6.2.2015 tme 9.00 liipupajedem maŋa. Čáitáldâh puáhtá kuuvij, fiilmâi já nuorâi pargoi peht uáinusân tábáhtus vijđes merhâšume ellee sämikulttuur uássin. Čáitáldâhân puáhtá uápásmuđ Anarist vyesimáánu 10. peeivi räi, mon maŋa čáitáldâh jotá Ucjuuvâst Vuáču peht Heetan. Taaiđâtábáhtusah láá iloliih já ivnááh tábáhtusah - tooid láá valmâštâllâm ubâ ive eromâšávt škoovlâin, kost máttáátteijeeh láá toimâm iäljárávt nuorâi stivrejeijen. Tábáhtus addel nuoráid tilálâšvuođâ ovdediđ táiđuidis, čäittiđ taid meid iärrásáid já finniđ oovdânpyehtimijn movtijdittee macâttâs tuámmárijn sehe stuorrâ juávhust páihálijd já eres kuávluin puáttám kuosijd.
Säminuorâi taaiđâtábáhtusah láá uárnejum 1970-lovo pelimudo rääjist. Aalgâst Säämi parlament já páiháliih sämiseervih lijjii uárnejeijen Laapi lääni nuorâilävdikode vuálásâžžân. Sämmilij škovlâašijrääđi, mii asâttui ovdediđ sämimáttááttâs, ornij tábáhtusâid 1990-lovo pelimuddoost. Rääđi tooimâ lopâttii já ton pargoid sirdii Sämitiigán, mii lii koordinistâm orniimijn ive 1998 rääjist.
Säminuorâi taaiđâtábáhtus kuulâi vistig väldikodálii Nuorâi taaiđâtábáhtusâi rááiđun ohtân páihálij tábáhtusâin. Tääl tot lii Nuorâ Kulttuur–viärmáduv kuávlulijd tábáhtussáid verditittee kejâlmâs, kost väljejuvvojeh ovdâsteijeeh kiiđâ uáivitábáhtusân teikâ Škoovlâ stuorrâjuhlen, mii uárnejuvvoo meri-iivij. Taaiđâtábáhtusân kočoh puoh sämipaarnijd já -nuorâid sehe sämikielâ teikâ sämikielâlii máttááttâsâst leijee paarnijd já nuorâid.
Válduteema meriduvvoo väldikodálii tábáhtus tanssâ-, muusik- teikâ teatterteema miäldásávt, mon lasseen ohjelmist lii miinii eromâšávt sämikulttuurân lohtâseijee teemaid. Taaiđâtábáhtus ulmen ij kuittâg lah tuše ärbivuovij kattim, peic eres taaiđâšlaajah láá vuáruluvâi fáárust. Teeman láá lamaš el. kovetaaiđâ, tihtâkišto, muusikjuávhust čuojâttem, ráiđukove, uánihis fiilmah, roolipihtâseh, sämimááccuh- já tyejičáittuseh, juáigus- já muusikpargopáájáh.
Säminuorâi taaiđâtábáhtus váldu-uárnejeijen lii sämitige škovlim- já oppâmateriaallävdikodde, já orniimijd koordinist škovlim- já oppâmateriaaltoimâttâh. Orniimáid uásálisteh meid sämikuávlu kieldah. Taaiđâtábáhtus kulá škoovlâi ihásii pargo-ohjelmân já tábáhtusah uárnejuvvojeh škovlâoho ääigi. Tábáhtus sehe väldikodálijd tábáhtussáid uásálistem ruttâd Máttááttâs- já kulttuurministeriö.
Lasetiäđuh:
Marjo-Riitta Rantamäki, marjo-riitta.rantamaki(at)samimuseum.fi, +358 (0)40 571 5670 Anni Näkkäläjärvi, anni.nakkalajarvi(at)samediggi.fi, +358 (0)40 511 1821
|
|
| Viimeksi päivitetty ( 29.01.2015 ) |