Juhâvyemeh láá lamaš pivnohis aassâmsajeh ovdâhistorjálij aaigij rääjist. Meid Lemmest láá meerhah ulmuin, kiäh assii tobbeen čuođijd iivijd tassaaš. Aalmuglâšmeeci kuávlust láá kavnum suullân 700 kodderogged, main kodeh pivdojii 1800-lovo räi. Njurgoiluovtâ luándupäälgis jotá oovtâ taggaar kodderoggejuávhu čoođâ.

Bivdorokkit. Govva: Matti Mela

Ko kodeh kiäppánii já puásuisämmiliih pottii kuávlun 1800-lovo loopâst, Lemmee vyemeest šoodâi almolubbon puásuituálu. Siämmást kuávlun šoodâi vuossmuu tove pisovâš aassâm. Tááláš-uv Njurgoiluovtâ eellim vuáđuduvá tuurism lasseen puásuituálun. Tot uáinoo čielgâsávt sijdâkooveest já jieškote-uv huksiittâsâin. Stuárráámus uási Lemmee aalmuglâšmeeci kuávlust kulá Sallâvääri palgâsân, mon puásuiloho lii suullân 7500.

Vuossmuš kollekumeštâs hokâttâlâi kollekuáivoid Lemmei jo moonnâm ihečyeđe aalgâst. Tuođâlâš kollekurgâlem tábáhtui eskin suáđi maŋa 1940-lovvoost, kuás kolleväldidmeh lijjii enâmustáá paijeel čyeđe. Maašinlâš kollekuáivum keččâlui vuossmuu tove jo 1950-lovo aalgâst. Táálááh kollekuáivooh láá suullân siämmáá ennuv ko stuorrâ kollekurgâlem ääigi, mutâ kuáivummaašin kevttim lii muttám kollekuáivum vuovijd. Rovâdâsjäävrist Jäviläävži peht Kollehamânân jottee merkkejum päälgis jotá jieškote-uvahasij kolleväldidmij čoođâ.

Taan ääigi stuárráámus uási aalmuglâšmeeccist jottee ulmuin láá vandârdeijeeh. Meccihaldâttâs huolât vandârdemráhtusijn, uápistmist já vakšuumist. Ulmen lii siäiludiđ Lemmee meccilágán luándusuojâlemkuávlun meiddei puátteevuođâst. Lemmee aalmuglâšmecci viettee 60 ive šoddâmpeivijuhlijdis siämmást kuuđáin eres aalmuglâšmeccijn ive 2016. Luuvâ lase aalmuglâšmeeci aalgâaaigijn.