Ijâstâl nuuvt, et jieh hettii pirrâduv

Tooimâ návt!

• Ceggii telta togobeht, mii lii telttaastâllâm várás čujottum, mut ohtânmaanoost enâmustáá pirrâmpeeivi teikkâ kyehti. Jis telttasajeh iä lah, te valjii pyereeb ovdeláá kiävtust lamaš ijâstâllâmsaje ko aaibâs uđđâ saje. Luándusuojâlem-kuávluin telttaastâllâm sáttá leđe loválâš tuše tađe várás čujottum soojijn.

• Keččâl leđe ijjâdhánnáá jäävvilkuolbânijn já eres heerkiht kollee kuávluin.
• Ele hettii iärrásijd, kote kevttih telttasaje tâi ävđintuve. Sij-uv halijdeh kevttiđ kuávlu palvâlusâid já siämmást navdâšiđ luándu ráávhust. Hemâdâs kepidem várás stuorrâ juávhuh pyehtih jo-uv juáhásiđ ucceeb juávhoid tâi valjiđ taggaar ijâstâllâmsaje, kost iä lah eres ijâstelleeh.
• Ele tiskáá liitijd njuolgist čácáduvvâin tâi kááivu lohe alne. Vääldi tiskámčääsi liitán já poosâ tast purâdemkáálvuid. Njomâsit kevttum poossâmčääsi enâmân tuárvi kuhás čácáduvvâst. Jis lii máhđulâš kevttiđ lieggâ čääsi, te ij taarbâš kevttiđ tiskámamnâsijd.
• Posâdât tienuuvt, et saibâ teikkâ šampoo ij peesâ kulgâđ njuolgist čácádâhân. Vääldi poossâmčääsi liitán já njomâsit poossâmčaasijd enâmân.
• Keevti telttasaje hiivsig, jis taggaar lii.
• Jis telttasaajeest ij lah hiivsig, te kuáivu kukkákuáivoin roge hiivsigpasâttâsâi várás taggaar sajan, mii lii tuárvi kukken čácáduvvâin, käldein, pálgáin já ijâstâllâmsaajeest. Ubâ leirâjuávhu táárbui várás puáhtá kuáivuđ ohtsii roge. Luávdi pasâttâsâid nuuvt, et luptiih koivum eennâmčuági maasâd sajasis. Keevti WC-pááppár šiäštulávt.
• Ane vuáđujuurdân tom, et ijâstâlmist ij pääsi maggaargin luoddâ. Ele räähti peevdijd, peeŋkâid tâi eres koskâpuddâsâš leirâráhtusijd. Čurgii ain luonijd já eres luodâid, ovdil ko vuálgáh leirâsaajeest.

Mondiet?

Ko tun ijâstâlâh telttaastâllâm várás vuáđudum soojijn, te šaddodâh já eennâmvuáđu koleh tuše uccáá, tondiet ko telttasajeh láá vuávájum killáđ kulâttem nuuvt pyereest ko máhđulâš.
 

Ijâstâllâm kuulât eenâb šaddoduv já eennâmvuáđu ko väzzim, tondiet ko talle kalga leđe siämmáá saajeest kuhheeb ääigi já táválávt taggaar saajeest, mii lii ärgi kuullâđ.

Riddočaasijn kobđoo purrâmâšpasâttâsah, pyeidi, lyeneh já suptâ mainâsteh tast, et tobbeen láá liteh tiskájum ärbivuáválávt njuolgist čácáduvvâst teikkâ kiinii lii posâdâttâm. Tággáár saajeest lii unohâs väldiđ čääsi mälistem várás já tiskámamnâseh já purrâmâšpasâttâsah sättih lasettiđ máhđulâšvuođâ, et ton kuávlun šaddeh mirhâliih čuovjistiäpuh.

Leirâsoojij puoh ilgâdumos meerhah láá hyeneeht lovdum pooškah já WC-pápáreh. Esteetlii hááitu lasseen toid sáttá lohtâšuđ meid tiervâsvuođâlâš hemâdâs, jis kolibakteereh šaddeh čääsiväldimsajan teikkâ joba vuáđučáácán.