Lemmeevyemi

Lemmeevyemi lii Njurgoiluovtâ já Kollehaammân koskâsâš, suullân 22 km kukkosâš juhâuási. Keessiv juuvâ alne joteh vuárukárbáh. Juuvâ ridoi mield jotá merkkejum vandârdemkiäinu.

Rovâdâskorže

Rovâdâsjuuhâ lii Lemmee stuárráámus uálgijuuhâ. Tot lii njuáidus juuhâ, mon láá kurdám suddâmčääsih. Rovâdâsjuuhâ tuođâi virdáá eskin juhânjäälmi alda, já juuhâ luáštá love meetter alosâš čäcikoržen Lemmei. Korže ja ton källeesiäináás ävži sehe roobdâi stáálukirno hámásiih kuurah láá šoddâm uásild jieŋâi suddâmčaasij já uásild tááláá juhâeroosio tiet.

Rovâdâskorže lii ohtâ Lemmee aalmuglâšmeeci pegâlmâsumos luándučuosâttuvvâin já uáinámušâin. Čäcikorže lii ruávisvuođâs tááhust mučis uáinus. Vandârdeijee ferttee väldiđ vuotân, ete Rovâdâskorže kulá Lemmee aalmuglâšmeeci raijiittâsuásán, kost lihâdem lii loválâš tuše merkkejum pálgái alne. Rovâdâskooržán piäsá vääzin vandârdemkiäinui mield teikkâ Lemmee irâtteijei juhâkárbái sáátust. Rovâdâskorže lii sajadum togobeht, kogo Lemmee ja Rovâdâsjuuvâ ovtâstuvvâv.

Kove: Reijo Nenonen, Vastavalo.fi

Juuvâkielâs

Suullân 9 km keččin Njurgoiluovtâ Siijdâst lii Juuvâkielâs-nommâsâš tuodâr, kuus jotá merkkejum päälgis. Tuoddâr alne lekkâseh mučis várduseh Lemmee vuámán já tuoddárijd ton pirrâ.

Sallâvääri pygályssaje

Riemâšjuuvâst, Aanaar-Kittâl –maađij piällást vuálgá 6 km kukkosâš merkkejum päälgis ovdiištum puásuipygályssajan. Tobbeen lii ävđintupe já telttaastâllâmsaje. Pygálysäiđi kámpáidiskuin kulá Laapi tivrâsumosáid kulttuurhistorjálijd čuosâttuvváid. Maađij piällás puáhtá maccâđ siämmáá pálgá mield, nuuvtpa määđhi kukkodâhhân šadda 12 km.

Kaabi Joovnâ kieddi

Kaabi Joovnâ kieddi lii puáris puásuitáálu Lemmee nuorttâriddoost Njurgoiluovtâst.

Váábu Maati aassâmkieddi

Váábu Maati tupe já ton aassâmkieddi Paajeeb Lággujäävri riddoost lii ohtâ Lemmee aalmuglâšmeeci tivrâs ärbienâdâhčuosâttuvvâin.

Kollekuávlu

Kollekuáivum historjá já tááláš äigi lii uáinimist aalmuglâšmeeci váimusist Kollehaammân já Jäviluáivi koskâsii kuávlust. Motomeh taan ääigi kollekuáivoin väldih kuosijd vuástá, nubeh halijdeh kuáivuđ ráávhust. Kuávlu čoođâ jotá merkkejum vandârdempäälgis, Kollehamânist Rovâdâsjáávrán šadda 20 km kukkosâš mätki.

Kodderogeh

Lemmee Ergijäävri já Čuáđgijäävri kooskâst lii ohtâ Suomâ stuárráámusâin pivdoroggevuáháduvvâin. Rááiđust láá 261 rogged já tot lii paijeel 3 kilomeetter kukkosâš. Ergijävrkuoškii taavaakeččin aaibâs Ergijävrkuoškii láigukámpá aldasijn lii suullân kilomeetterpele kukkosâš ráiđu. Luuvâ lase Lemmee kodderoogijn.