Sämitige 21 jesânid já nelji värijeessân väljejuvvojeh sämmilij kooskâst jyehi niäljád ive vaaljâin. Sämikuávlu jyehi kieldâst kalga valjiđ ucemustáá kulmâ ovdâsteijee Sämitiigán. Vaaljâin jienâsteh toh sämmiliih, kiäh láá merkkejum vaaljâluvâttâlmân. Jienâstemvuoigâdvuotâ addel meiddei vuoigâdvuođâ leđe iävtukkâssân. Ovddiih vaaljah lijjii čohčuv 2019.
Toimâpaje 2020-2023 jesâneh já värijesâneh
Maht mun peesâm jienâstiđ?
Jis tun lah uuccâm vaaljâluvâttâlmân já uážžum jienâstemvuoigâdvuođâ, vyerdi čuávuvâš vaaljâid já jienâst! Puoh vaaljâluvâttâlmân merkkejum sämmiliih uážžuh vaaljâive poostâ mield almottâs jienâstemvuoigâdvuođâstis.
Jis oovdeeb vaaljâi ääigi lijjih vala vuálá 18-ihásâš, mutâ tääl puávtaččih jienâstiđ, tun koolgah uuccâđ čuávuváin vaaljâin vaaljâluvâttâlmân.
Ovdil Sämitige vaaljâlävdikodde vuolgâttij vaaljâi kooskâst 18 ihheed tiävdám nuoráid uuccâmluámáttuv pááikán, mutâ lii joskâm tast ive 2019 vaaljâin. Tun koolgah jieš leđe aktiivlâš já uuccâđ!
Ive 2019 vaaljah toimâțtuvvojii postâjienâstmáin 2.-30.9.2019 koskâsii ääigi. Taat meerhâš tom, ete ärbivuáválâš vaaljâpeeivi jienâstem sämikuávlu kieldâin ij uárnejum. Postâjienâstmist jyehi jienâstemkiälbulii sämmilâžân vuolgâttuvvoo kirjettum reivâ, mast lii stemppâlistum jienâstemlippu. Ko macâttah reeivâ poostân tâi Sämitige vaaljâlävdikode toimâttâhân Sajosân jienâstemääigi siste, tuu jienâ rekinistoo mieldi vaaljáid.
Maht mun uusâm vaaljâluvâttâlmân?
Sämitige vaaljâluvâttâlmân kalga uuccâđ ain ive loopâst ovdil vaaljâive. Uuccâmääigist almottuvvoo il. Sämitige nettisiijđoin já loostâin. Vaidâlittee uuccâm lii tuše ohtii neelji ivveest, ige vaaljâluvâttâlmân pyevti uuccâđ kuás peri.
Uuccâmluámáttuv kaavnah tääbbin(LINKKI?). Mušte lahteđ puoh taarbâšlijd lahtosijd ucâmušân, tast ko tot iššeed ucâmuš kieđâvušmist.
Vaaljâluvâttâlmist puáhtá meiddei vyelgiđ meddâl. Almottâs kalga porgâđ čálálávt já toimâttiđ vaaljâlävdikode toimâttâhân majemustáá ive loopâst ovdil vaaljâive.
