Säämimuseo aalmuglâš pargon lii vuorkkiđ säämi kulttuuräärbi Suomâst. Pargo váimusist láá mii čuágálduvah, moid kuleh tiiŋgah, čuovâkoveh, taaiđâ, olgomuseo viäsuh já arkkâdâh- sehe kietâkirjerájuamnâstuvah. Mij siäiludep, paijeentoollâp, tipšop já oovdânpyehtip jieččân čuágálduvâid sehe porgâp toid lahtojeijee tutkâmuš.
Čuágáldâhtooimâ linjee já stivree Säämimuseo čuágáldâhpoolitlâš ohjelm. Čuágálduvah stuáruh iänááš skeŋkkimijguin já dokumentistmáin aktivlávt onnáá peeivi almonijd. Mij árvuštâllâp tárkká čuágálduvâi vijđedem, ko čuágálduvah láá jo maaŋgâi oosij uáli viijđáseh.
Čuágálduvváid puáhtá uápásmiđ Siidast já internetist
Mii čuágálduvváid, moh muštâleh jieškote-uv äigipaje sämikulttuurist já -uáinuin, piäsá uápásmiđ Siida váldučáitálduvâst já mulsâšuddee čáitálduvâin. Säämimuseo čuágálduvâi aarnijd puáhtá še tutkâđ internetist Finna-tiätupalvâlusâst já tiiŋgâi 3D-maalijdkis Sketchfab-nettisiijđoin.
Äigikyevdilis tiäđu Säämimuseo čuágáldâhtooimâin káv ná Siida nettisiijđoin, sosial media oolijn sehe Säämimuseo blogist.
Čuágálduvah láá kevttei várás
Mii čuágáldâhpargo kuávdáš árvu lii siärvuslâšvuotâ. Pargo vuáđuduvá vuáruvaiguttâsân sehe siärvus uásálistmân museopaargon, ton vuávámân já oovdedmân. Säämimuseo čuágálduvah láá nuuvt tiätuäŋgiris aalmug ko eromâšávt toi aktivlijd kevtteid – sämisiärvus jesânijd já totkeid – várás. Mij halijdep jieččân čuágáldâhpargoost huámášiđ eromâšávt sii táárbuid já tuoivuid.
Mii čuágáldâhpargeeh västideh čuágálduvváid lahtojeijee äššigâskoččâmuššáid šleđgâpostáin já puhelimáin. Čuágálduvváid kullee tiiŋgâid puáhtá tutkâđ muuneeld soppum ääigi, já tiiŋgâin puáhtá še tiiláđ čuovâkuuvijd. Mij luoihâttep museotiiŋgâid eres museoid já kevttimčuágálduv tiiŋgâid meiddei eres tuáimeid. Mij tuáivup, ete väldivetteđ tutkâm- já luoihâttemaašijn ohtâvuođâ puorijn aigijn!
Säämimuseo čuágálduvah värrejeh uđđâ vistijd
Siida-viäsu vijđedemhaahâ lii eidu joođoost, já ton ohtâvuođâst mij sirdep Säämimuseo čuágálduvâid sierâ čuágáldâhviäsun alda tááláá Siida. Návt čuágálduvah já čuágáldâhpargo finnejeh ulmemiäldásijd soojijd já čuágáldâhtooimâ puáhtá orniđ ain siärvuslubbon. Nubástuspargoh pyehtih tovâttiđ ucánjáhháá ájánem čuágáldâhpalvâlussáid, mutâ mij viggâp orniđ tutkâmuškollimijd já västidiđ koččâmuššáid nuuvt jotelávt ko máhđulâš.