Iilvâs (Lynx lynx)lii koskâmatsas kissáelleid kullee piätuellee, mii iälá Fennoskandiast, Ruoššâst, Tiibetst já smavvâseh populaation Euraasian.

Siskáldâslisto

    1 Stuárudâh já olgohäämi
    2 Lavdâm já eellimpiirâs
        2.1 Suomâ
    3 Eellimuđheh já lattim
    4 Lasanem
    5 Käldeeh

Stuárudâh já olgohäämi

Iilvâs lii 70-140 cm kukke, já ton seibi lii 15-26 cm. Iilvâs tiäddá táválávt 8-25 kg. Ores lii stuorráb ko niŋálâs. Iilvâs turkkâ lii ruopsâd,ruškad teikkâ ränis kirjáá. Čuovji vyelni, käŋŋirijn,čiäpáttist já peeljih siskiipele turkkâ lii vielgis. Iilvâs peeljih keeči láá tiepih. Iilvâs lii vuáhádum pyereest Suomâ táálván: kuhes juolgijguin já stuorrâ kepilijguin mätki ovdán kossâ-uv muottust já assaas turkkâ syeijee puolâšijn.

Lavdâm já eellimpiirâs

Iilvâs máášá merâtääsi 5 500 meeter räi. Pyeremus ilvâs máášá vyevdi mutá ilvâs stäävee ordârääji taavaapeln. Lasseen ilvâs stäävee Koskâmeerâ meecist já Koskâ-Aasia miestâ soojijd já rääsikoškejolgádâid.

Suomâ

Suomâst ilvâs iálá ubâ staatan.Puásuituálu kuávlun, Tavepoođâeennâm,Koskâpoođâeennâm já Maadâpoođâeennâm nääli lii härvi. Suomâ ilvâsnääli stuárudâh árvuštâl ive 2018, 1 865–1 990 ohtâgâsâid.

Eellimuđheh já lattim

Iilvâs lii piärguporree piätuellee. Ehidist iilvâs vuálgá pivdomáátkán. Kissáellee tärhis kulo já uáinu vievâst tot áicca saallâsellee já njááhá várugávt saallâs kuávlun. Tot piärttoo kierdâvávt já vuárdá olmâ ääigi. Kivkked tot stuŋgit hirmâd liävttoin tâi vollit saallâs kiäigukoozâi joba käävci meetter kukkosáin čelliittâssáin. Iilvâs ij vyelgi uávuttâllâd saallâs Iilvâs tehaliih salâselleeh láá meccikaavrâs já njuámmileh, mut riemnjis, uárree, lodeh já uccâjursseeh heivejeh še pyereest tieppipeelji purrâmâšliiston

Lasanem

Kiđđâtälvi-iijâi tuálih oresilvâseh korrâ taištalmijd niŋálâsâi lijkkuumist. Ores já niŋálâs lává oovtâst tuše muáddi oho kieimâm ääigi, ko iilvâs lii luándus peeleest ohtuunisorroo. Táválávt niŋálâs šoddad kyehti čiivgâ källee vuálá tâi stuorrâ muorâ vuovdân, kuus tot lii ráhtám peesi. Čiivgâh čuavuh niŋálâs suullân ive ääigi já uáppih tast pivdem tááidu.