Tu´ri´smm

 Lää´ddjânnam šuurmõs kå´dd Aanar lååmm vo´sttjee´jes o´dinakaišlajjsaž luâđaines. Mäŋgg doohhat jäu´rred da suâll’jed, kooi mie´rr ij leäkku teâđast, čue´đ tuõddâr di määŋgpeällsaž šââdd, luâttskoott da -jie´lli ou´dde piiriee´jji vuu´dest joo´ttjid mooštid da tobddmõõžžid, koid muu´štet veâl ee´jji ǩee´jjest.

Määŋgpeällsaž ee´jjääi´j ta´rjjee vuu´dest mu´šttemnallšem tobddmõõžžid; pei´vv iinte´mes iin ǩie´zzest, čâhčča lõsttǩeârõk, tälvva muõtt da jiõŋŋ di ǩiiđ mie´ldd čuõvvneei luâtt mooččâdvuõđines. Neellj ee´jjääi´j paaldâst maainstet sa kä´hccen ee´jjääi´jest.

Tââ´v vääžnai åårram pääi´ǩes diõtt Aanar lij leämmaž čõõđ ääi´j kulttuur kaaunõõttâmpäi´ǩǩ da luâđlaž jåå´ttemǩeäinn Jiõŋŋmie´rre. Suâlčiõ´lj tu´ri´smmkõõskõs lij jeä´leč, tuõddri pirreem sijdd Urho Kekkonen meermie´cc õlddsin. Peäglvaž Suâlčiõ´lj tuõddrin lij 438 mettra kaggõõtti Mooččâšvuei´vv, koon vuäitt vo´sttjõõttâd da vuei´tted vää´ʒʒee´l, aautin le´be čuõigghiissin. Suâlčiõ´ljest kaaunak friijvuõ´tte puk mâi´d taarbšak čiõrstõõllâmkõõskõõzzâst da luâttvaaʒʒtõõǥǥin sa laaugõõttâm di hotee´lid, restraanttid da jee´res kääzzkõõzzid.

Aanarjääu´r reeddast åårrai Aanar ceerkavsijdd lij Lää´ddjânnam sää´mkulttuuur kõskkpäi´ǩǩ, koon â´lddpirrõõzzâst da ââldmõs siidin sää´m ä´rbbvuõtt lij põõššâm jie´llemviõkksânji. Sää´m-mu´zei Siida da Meä´cchalltõõzz Luâttkõõskõs ta´rjjee teâttpa´ǩaat, kåå´tt oudd ǩiõččlâ´sttemnallšem toobdâlm sää´mvuõđâst. Sää´mkultturkõõskõs Sajos lij peä´lstes ǩie´ssemviõkksaž määŋgkultturvuõđ kaaunõõttâmpäi´ǩǩ, määŋgpeällsaž lettõõttâmpõrtt da õlltää´zzaž koŋresskõõskõs.

Aanar kå´dd kõskkad primeârlânji tu´ri´smm ooudâsviikkmõ´šše. Vuu´d tu´ri´smm-markknâ´sttmõõžžâst va´sttad Inari-Saariselkä Oy.